نواز شریف جدید پاکستان دے معمار ہن، ملک دی چنڈ چنڈ وچ ترقیاتی کماں دا سہرا نواز شریف کوں ویندے، عطا اللہ تارڑ

لاہور۔ 13 دسمبر (اے پی پی) وفاقی وزیراطلاعات و نشریات عطا اللہ تارڑ آکھیے جو قائد محمد نواز شریف جدید پاکستان دے معمار ہن، ملک دی چنڈ چنڈ وچ ترقیاتی کماں دا سہرا نواز شریف کوں ویندے۔ پی ٹی آئی کردار کُشی اَتے نفرت دی سیاست کوں ودھارا ݙِتا، تبدیلی دا نعرہ لا تے ملک وچ تباہی گھن آئی ڳئی۔ وزیراعظم محمد شہباز شریف دی قیادت وچ ملک ترقی دے رستے تے ٹُر چُکیے، کہیں کوں ترقی دا سفر روکݨ دی اجاز ت نہ ݙیسوں۔اے ڳالھ انہاں پریس کلب لاہور وچ سینئر صحافی محمد نوازرضا دی کتاب “مرد آہن محمد نواز شریف” دی تقریب گھنڈ کھلائی توں خطاب کریندے آکھی۔وفاقی وزیر آکھیا جو قائد محمد نواز شریف عوام کوں ریلیف ݙیوݨ کوں آپݨا نصب العین بݨایا ہویا اے، ملک دی ترقی ہووے یا معاشی بحالی، تاریخ اساکوں ݙسائے جو قائد محمد نواز شریف اَتے انہاں دے خاندان ملک وچ معاشی اصلاحات متعارف کروائن، شاندار ترقیاتی منصوبے ݙِتے، صنعتی ترقی کوں ودھارا ݙِتا۔ موٹرویزدا قیام ہووے، ہسپتال ہوون، فلاحی منصوبے ہوون، ہر منصوبے تے محمد نواز شریف دی مہر لڳی ہوئی اے۔انہاں آکھیا جو محمد نواز شریف ملک وچ وضع داری اَتے رواداری دی سیاست کوں ودھارا ݙِتا، جݙاں جو ݙوجھے پاسے ھک انتشاری ٹولے کردار کُشی و نفرت دی سیاست کوں ودھارا ݙِتا، نینگراں کوں گُمراہ کرݨ دی کوشش کیتی ڳئی، اَتے عوام دے ذِہناں وچ زہر بھریا ڳیا۔ پی ٹی آئی ملک اَتے معیشت کوں شدید نقصان پُڄایا۔عطا اللہ تارڑ آکھیا جو وزیراعظم محمد شہباز شریف دی مدبرانہ قیادت وچ ملکی معیشت کوں استحکام ملیا، معاشی اشاریے بہتر تھی ڳئن، اَتے اڄ عالمی ادارے ملکی معیشت وچ بہتری دا اعتراف کریندے پئن۔ انہاں آکھیا جو ترقی دا اے سفر ہݨ جاری رہسی اَتے کہیں کوں وی ایں سفر کوں روکݨ دی اجاز ت نی ݙتی ونڄ سڳدی۔