بی بی آصفہ بھٹو زرداری دی دسمبر دی پولیو مہم کیتے عوامی تعاون دی اپیل

اسلام آباد۔ 14 دسمبر (اے پی پی) خاتونِ اوّل بی بی آصفہ بھٹو زرداری والدین، سرپرستاں، عوامی نمائندیں اَتے کمیونٹی رہنماواں تے زور ݙِتے جو او15 توں 21 دسمبر 2025 تئیں ملک دے سارے صوبیں اَتے علاقیں وچ شروع تھیوݨ آلی قومی انسدادِ پولیو ویکسی نیشن مہم دی بھرپور حمایت کرن۔اتوار کوں ایوان صدر دے پریس ونگ توں جاری بیان وچ آصفہ بھٹو زرداری آکھیا جو ایں مہم دی کامیابی اجتماعی ذمہ واری تے منحصر اے اَتے خانداناں توں اپیل کیتی جو پنج سال توں گھٹ عمر دے ہر ٻال کوں پولیو دے قطرے ضرور پلاون۔ ایں مہم دے دوران ملک بھر وچ45.4 ملین ٻالاں کوں ویکسین پلاوݨ دا ہدف مقرر کیتا ڳئے۔انہاں آکھیا جو سرحد پار وائرس دی منتقلی روکݨ کیتے اے مہم افغانستان دی دسمبر پولیو مہم دے نال ہم آہنگی وچ چلائی ویندی پئی اے۔ انہاں شہید محترمہ بینظیر بھٹو دی جدوجہد کوں یاد کریندے آکھیا جو پاکستان وچ پہلی قومی انسدادِ پولیو مہم 1994وچ انہاں دی قیادت وچ شروع کیتی ڳئی ہئی اَتے انہاں دا وژن اڄ وی ایں مرض دے خاتمے کیتے قومی کوششاں دی رہنمائی کریندا پئے۔بی بی آصفہ بھٹو زرداری شہریاں توں اپیل کیتی جو او ویکسی نیٹرز دا خیرمقدم کرن، کہیں وی رہ ونڄݨ آلے ٻال دی اطلاع ݙیون اَتے فرنٹ لائن کارکنان دی حوصلہ افزائی کرن، کیوں جو متحدہ کوششاں نال ہی ایں وائرس دا خاتمہ اَتے پاکستان دے ٻالاں دے مستقبل دا تحفظ ممکن اے۔