پاکستان دی ترقی محبت، اتحاد اَتے انسانیت دے اصولاں نال جُڑی ہوئی اے، خواجہ محمد آصف

سیالکوٹ۔ 14 دسمبر (اے پی پی) وفاقی وزیر دفاع خواجہ محمد آصف آکھیے جو کرسمس دا تہوار ساری دنیا وچ عقیدت اَتے احترام نال منایا ویندے۔ حضرت عیسیٰ علیہ السلام دی ولادت ھک معجزه اے، اَتے حضرت عیسیٰ علیہ السلام دیاں تعلیمات انسانیت کیتے قیامت تئیں مشعلِ راہ ہن۔ اے ڳالھ انہاں سیالکوٹ کینٹ وچ منعقدہ کرسمس دی تقریب توں خطاب کریندے آکھی۔انہاں مزید آکھیا جو حضرت عیسیٰ علیہ السلام صلہ رحمی، بھرپی اَتے سانجھے احترام دا درس ݙِتا اَتے کہیں وی مذہب دے منݨ آلے ایں پیغام توں انکار نی کریندے۔ وفاقی وزیر دفاع آکھیا جو اے انہاں کیتے اعزاز دی ڳالھ اے جو او مسیحی بھیݨ بھراواں دیاں خوشیاں وچ شریک تھیندے پئن۔ انہاں آکھیا جو اساݙی مٹی ہی اساݙا ساریں توں وݙا رشتہ اے، جیڑھا اساکوں ھک ݙوجھے نال مضبوطی نال جوڑیندے۔انہاں آکھیا جو کُجھ مہینے پہلے اساݙی بہادر افواج جیں جرات اَتے عزم دا مظاہرہ کیتا، او پاکستان دی تاریخ دا ھک روشن اَتے سنہرا باب اے۔انہاں آکھیا جو پاکستان دا ترقی دا سفر دراصل محبت اَتے اتحاد دا سفر اے۔ پاکستان دی ترقی محبت، اتحاد اَتے انسانیت دے اصولاں نال جُڑی ہوئی اے، سارے مذاہب اَتے فرقے دے لوک ملک اَتے مٹی دی ڳالھ آوݨ تے ہمیشہ ھک نظرآندن۔خواجہ محمد آصف مزید آکھیا جو آندے ویلھےاساݙا ملک مزید ترقی کریسی، خوشحالی آسی جݙاں جو غربت اَتے بے روزگاری دے اَندھارے مک ویسن۔