وفاقی وزیراحسن اقبال دی زیرِ صدارت علامہ محمد اقبالؒ دی150 ویں سالڳنڈھ مناوݨ دے حوالے نال نیشنل کمیٹی دا اہم اجلاس

اسلام آباد۔ 15 دسمبر (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال دی زیرِ صدارت علامہ محمد اقبالؒ دی 150ویں سالڳنڈھ مناوݨ دے حوالے نال قائم نیشنل کمیٹی دا اہم اجلاس اسلام آباد وچ تھیا۔ اجلاس وچ وفاقی وزیر اطلاعات و نشریات عطاءاللہ تارڑ وی شرکت کیتی۔اجلاس وچ علامہ اقبالؒ دے نال نال قائداعظم محمد علی جناحؒ دی2026 وچ150ویں سالگنڈھ متعلق قومی سطح دیاں تقریباں دے انعقاد تے تفصیلی غور کیتا ڳیا۔ ایں موقع تے پروفیسر احسن اقبال آکھیا جو سال2026کوں قائداعظم محمد علی جناحؒ دا سال قرار ݙتا ویسی اَتے قائداعظمؒ دی 150ویں سالگنڈھ کوں قومی سطح تے شان و شوکت نال منایا ویسی۔وفاقی وزیر ݙسایا جو تقریباں کوں حتمی شکل ݙیوݨ کیتے ھک ذیلی کمیٹی قائم کیتی ویندی پئی اے جو پنج ݙینھ دے اندر آپݨیاں سفارشاں پیش کریسی۔ انہاں ہدایت کیتی جو تقریباں کوں بامقصد اَتے مؤثر بݨاوݨ کیتے مربوط حکمتِ عملی اپنائی ونڄے تاں جو انہاں دا اثر صرف رسمی نہ رہوے بلکہ فکری اَتے تربیتی پہلو وی اُبھرے۔پروفیسر احسن اقبال آکھیا جو قائداعظم دا وژن ہی پاکستان دی مکمل رہنمائی کریندے اَتے انہاں دے اصول اتحاد، ایمان اَتے تنظیم کوں بھرپور انداز وچ اُبھاریا ویسی۔ انہاں ایں ڳالھ تے زور ݙِتا جو قائداعظمؒ دی زندگی اَتے قیامِ پاکستان کیتے انہاں دے کردار کوں نمایاں کرݨ کیتے معیاری ڈرامہ سیریز وی تیار کیتی ونڄے۔