پاکستان امداد تے انحصار دی بجائے پائیدار معاشی ترقی اَتے باہمی مفاد تے مبنی سانجھے داری کیتے تجارت اَتے سرمایہ کاری کوں مرکزی حیثیت ݙیندے، وفاقی وزیر خزانہ دا سی این این بزنس عریبک کوں انٹرویو

اسلام آباد۔ 15 دسمبر(اے پی پی)فاقی وزیر برائے خزانہ و محصولات، سینیٹر محمد اورنگزیب آکھیے جو پاکستان ہݨ امداد تے انحصار کرݨ دی بجائے پائیدار معاشی ترقی اَتے باہمی مفاد تے مبنی سانجھے داری کیتے تجارت اَتے سرمایہ کاری کوں مرکزی حیثیت ݙیندا پئے، جیندے تحت بین الاقوامی شراکت داراں، خاص کر خلیجی ملکاں نال اقتصادی رابطیاں کوں ٻیا مضبوط بݨایا ویندا پئے۔ سینیٹر محمد اورنگزیب آکھیا جو گزریل 18 مہینے اچ پاکستان ھک جامع میکرو اکنامک استحکام پروگرام تے کَم کریندا رہے، جیںدے نتیجے اچ ودھ کامیابیاں مِلین۔ مہنگائی، جیڑھی ھک ویلھے ریکارڈ 38 فیصد تئیں پُڄ ڳئی ہئی، ہݨ گھٹ تھی تے سنگل ݙِجٹ تے آ چُکی اے۔ مالیاتی محاذ تے پاکستان پرائمری سرپلس حاصل کیتن جݙاں جو کرنٹ اکاؤنٹ خسارہ مقررہ اہداف دے اندرو اے۔ انہاں آکھیا جو زرمبادلہ دی شرح اچ استحکام آئے اَتے ذخائر بہتر تھی تے تقریباً 2.5  مہینے دیاں درآمدات دے برابر تھی ڳئن۔ وفاقی وزیر خزانہ تریے عالمی کریڈٹ ریٹنگ ایجنسیاں ولوں پاکستان دی ریٹنگ اَتے آؤٹ لُک اچ بہتری اَتے آئی ایم ایف دے ایکسٹینݙݙ فنڈ فیسلٹی دے تحت ݙوجھے جائزے دی کامیابی نال تکمیل کوں بین الاقوامی کامیابیاں قرار ݙِتا۔ ٹیکس اصلاحات دے حوالے نال سینیٹر اورنگزیب ݙسایا جو ٹیکس ٹو جی ڈی پی شرح 8.8  توں ودھ تے 10.3 تھی ڳئی اے، اَتے رئیل اسٹیٹ، زراعت اَتے ہول سیل ڄھئیں گھٹ ٹیکس ݙیوݨ آلے شعبیاں کوں ٹیکس نیٹ اچ گھن آیا ویندا پئے۔ انہاں خلیجی ملکاں (سعودی عرب، متحدہ عرب امارات، اَتے قطر) دی طویل المدتی معاونت کوں سراہیا اَتے آکھیا جو ہݨ اے تعلق تجارت دے فروغ اَتے سرمایہ کاری دے بہاؤ دے نویں مرحلے اچ داخل تھیندا پئے۔ ترسیلاتِ زر کرنٹ اکاؤنٹ کیتے اہم کردار ادا کریندے پئن، جیڑھے ایں سال 41  توں 42  ارب ݙالر تئیں پُڄݨ دی توقع اے۔