خیبر پختونخوا دی عوام دی خوشحالی انھاں دا بنیادی حق اے، بدقسمتی نال کوئی وی سنجیدگی نال صوبے دی ترقی کیتے نئی سوچیندا پیا، عطاء اللہ تارڑ

اسلام آباد۔ 28 جنوری (اے پی پی) وفاقی وزیرِ اطلاعات تے نشریات عطاء اللہ تارڑ آکھیے جو خیبر پختونخوا دے عوام دی خوشحالی انھاں دا بنیادی حق اے، بدقسمتی نال کوئی وی سنجیدگی نال صوبے دی ترقی کیتے نئی سوچیندا پئیا۔ خیبر پختونخوا اچ ٻہوں صلاحیت (پوٹینشل) موجود اے، اتھاں قیمتی جیمز سٹونز تے ماربل اربوں ڈالر مالیت دے ہن پر انھاں وسائل کوں ریگولیٹ کرݨ کیتے کوئی موثر نظام موجود کائنی۔ محمد نواز شریف دی قیادت اچ مسلم لیگ (ن) ترقیاتی منصوبیاں دا جال وچھایا، ترقی کوں ڳلی محلیاں تائیں پڄائے۔ لیپ ٹاپ سکیم تے دانش سکولز دے ذریعے میرٹ تے تعلیم و تربیت فراہم کیتی ڳئی۔ انھاں لیپ ٹاپس دی بدولت کورونا وبا دے دوران “ورک فرام ہوم” تے آن لائن تعلیم ممکن تھئی۔ دانش سکولز توں فارغ تھیوݨ آلے طلبہ اج مختلف شعبیاں اچ خدمات سرانجام ݙیندے پئن۔ اج سیف سٹی منصوبہ عوام دے تحفظ تے بروقت کارروائی کیتے موثر ثابت تھیندا پئے ۔ اے ڳالھیں انھاں بدھ دے ݙینہہ اتھاں وزیراعظم دے کوآرڈینیٹر برائے اطلاعات خیبر پختونخوا اختیار ولی خان دے ہمراہ خیبر پختونخوا یوتھ اسمبلی نال ڳالھ مہاڑ کریندیں ہوئیں آکھی۔وفاقی وزیرِ اطلاعات آکھیے جو نینگراں کوں اڳوں ودھݨ کیتے موثر پلیٹ فارم ݙیوݨ وقت دی اہم ضرورت اے پئی۔ انھاں آکھیے جو طلبہ سیاست نال وابستگی دے دوران انھاں کوں قیمتی تجربے حاصل تھئے جیہڑے پوری زندگی کم آندن۔ یوتھ اسمبلی دا پلیٹ فارم ٻہوں اہم اے جیندے ذریعے پالیسی بݨاوݨ دے عمل کوں سمجھݨ دا موقع ملدے ۔ انھاں آکھیے جو اپوزیشن کوں صرف تنقید نہیں کرݨی چاہیدی بلکہ “شیڈو کابینہ” بݨاوݨی چاہیدی اے تے واضح ݙسائݨا چاہیدے جو مسائل کوں کیویں حل کیتا ونڄ سڳدے۔ عطاء اللہ تارڑ آکھیے جو مسلم لیگ (ن) ہمیشہ ترقی دی سیاست کیتی اے۔ صحت تے تعلیم دے شعبیاں اچ مرحلہ وار ترقی دا آغاز کیتا ڳیا۔ انھاں آکھیے جو اج کل ترقی دی سیاست دی بجائے “بیانیے” دی سیاست اڳوں آ ڳئی اے، سوشل میڈیا تے بیانات کوں اہمیت ݙتی ویندی اے پئی جݙاں جو حقائق دی قدر گھٹ تھیندی ویندی اے ۔ انھاں آکھیے جو ڈیجیٹل میڈیا دے ارتقاء دے نال کوئی باقاعدہ ادارتی ڈھانچہ یا ریگولیٹری فریم ورک موجود کائنی، جیندے پاروں اج عدم برداشت تے ہراساں کرݨ جیھے سماجی مسائل سامݨے آندے پئن۔ وفاقی وزیر آکھیے جو خیبر پختونخوا دے قیمتی پتھراں دی مالیت ارباں ڈالر اے پر کوئی موثر نظام کائنی۔ اٹلی دی مثال ݙیندے ہوئیں انھاں آکھیے جو اتھاں ماربل اوہو کڈھیندے جیندے کول مہارت ہوندی اے، پر اتھاں طاقتور عناصر پہاڑاں کوں کٹیندے پئن۔ انھاں آکھیے جو 2013ء اچ نواز شریف پی ٹی آئی دی اکثریت دا احترام کریندیں ہوئیں انھاں کوں حکومت بݨاوݨ دی دعوت ݙتی جیہڑی ہک اعلیٰ جمہوری روایت اے۔ انھاں آکھیے جو پاکستان کڈنی اینڈ لیور انسٹی ٹیوٹ (PKLI) اچ ہک ہزار توں ودھ لیور ٹرانسپلانٹ تھئے ہن۔ راولپنڈی انسٹی ٹیوٹ آف کارڈیالوجی خیبر پختونخوا تے آزاد کشمیر دے مریضاں دا ٻوجھ چاوݨ پئے  انھاں آکھیے جو لیپ ٹاپ سکیم میرٹ تے ہئی، ایندا کوئی سیاسی مقصد کائنی ہئی بلکہ اے ملک دے مستقبل کیتے ہئی۔ دانش سکولاں دے ذریعے غریب ٻالاں کوں ایچی سن کالج دے معیار دی تعلیم ݙتی ویندی پئی اے۔ سیف سٹی منصوبے دا ذکر کریندے ہوئیں انھاں ݙسائے جو لاہور دھماکے دے ملزم کوں کیمریاں دی مدد نال فریم بائے فریم ٹریک کر تے گرفتار کیتا ڳیا۔ قصور دی معصوم زینب دے کیس دا حوالہ ݙیندیں ہوئیں انھاں آکھیے جو اگر فرانزک لیبارٹری نہ ہوندی تاں قاتل کوں پکڑݨ ممکن نہ ہوندا۔ انھاں افسوس کیتا جو باقی صوبیاں اچ وی اے کم ہووݨا چاہیدا ہئی پر بدھ قسمتی نال ہک صوبے (کے پی کے) اچ سیاست ہݨ شعر و شاعری تے ڳاݨیاں دی نذر تھی ڳئی اے ۔ اصل جدوجہد تعلیم، صحت تے انفراسٹرکچر کیتے ہووݨی چاہیدی ہئی پر اے “چور ڈاکو” دے بیانیے دو چلی ڳئی اے۔ انھاں آکھیے جو خیبر پختونخوا دی ترقی سب دی سانجھی ذمہ واری اے اتے اے قبول نئی کیتا ونڄ سڳدا جو ہک صوبہ بیانیے دے چکر اچ پچھوں رہ ونڄے۔