وفاقی وزیر قیصر احمد شیخ نال سلک وے امپیکس تے چینی بی آر آئی وفد دی ملاقات، پاکستان تے چین وچال سرمایہ کاری دے فروغ تے تفصیلی ڳالھ مہاڑ

اسلام آباد۔ 29 جنوری (اے پی پی) وفاقی وزیر برائے بورڈ آف انویسٹمنٹ قیصر احمد شیخ نال خمیس دے ݙینہہ سلک وے امپیکس تے چین دے بیلٹ اینڈ روڈ انیشی ایٹو (بی آر آئی) نال وابستہ اعلیٰ سطحی چینی وفد ملاقات کیتی۔ ملاقات اچ پاکستان تے چین دے درمیان ݙوپاسہ سرمایہ کاری، اقتصادی تعاون، تے مستقبل دے سانجھے منصوبیاں تے تفصیلی تبادلۂ خیال کیتا ڳیا۔ سرمایہ کاری بورڈ ولوں جاری بیان دے مطابق وفاقی وزیر قیصر احمد شیخ ایں موقع تے آکھیے جو پاکستان تے چین دی دوستی دیرینہ، آزمودہ تے مضبوط بنیاداں تے قائم اے ، جیہڑی وقت دے نال ٻیا مستحکم تھیندی پئی اے۔ انھاں آکھیے جو حکومتِ پاکستان چین دے نال اقتصادی شراکت داری کوں ٻیا ودھارا ݙیوݨ تے سرمایہ کاری دے نویں موقع پیدا کرݨ کیتے پرعزم اے پئی۔قیصر احمد شیخ چینی وفد کوں پاکستان اچ معدنیات، زراعت، انفارمیشن ٹیکنالوجی، ڈیجیٹلائزیشن تے ویلیو ایڈڈ شعبیاں اچ سرمایہ کاری دے وسیع امکانات دا ݙسیا۔