وزیراعظم شہباز شریف دا برآمد کنندگان کیتے وݙے ریلیف اتے مراعات دا اعلان

اسلام آباد۔ 30 جنوری(اے پی پی)وزیراعظم محمد شہباز شریف برآمد کنندگان کیتے ایکسپورٹ ری فنانسنگ دی شرح 7.5 فیصد توں گھٹ کر کے 4.5 فیصد کرݨ، بجلی دے ٹیرف اچ 4 روپے 4 پیسے دی مزید کمی، ویلنگ چارجز اچ 9 روپے دی کمی اتے چنڳی کارکردگی والے وݙے برآمد کنندگان کیتے ݙو سال تئیں “بلیو پاسپورٹ” دی مراعات دا اعلان کیتے۔ انہاں اے اعلان ملک دے نامور برآمد کنندگان اتے کاروباری شخصیات دے اعزاز اچ تقریب نال خطاب کریندے ہوئیں کیتے۔

وزیراعظم 2024 اتے 2025 اچ بہترین کارکردگی دی بنیاد تے کاروباری شخصیات کوں ایوارڈ وی ݙتن۔ وزیراعظم آکھیا جو او ملک دی کاروباری شخصیات ݙینھ رات محنت کر کے ملک دا ناں روشن کیتے اتے برآمدات ودھائن، برآمد کنندگان اوکھے حالات اچ بہترین کم کیتے اتے پوری قوم انہاں کوں مبارک ݙیندی اے کیوں جو انہاں دی محنت نال ملک اچ ارباں ڈالر آئن۔ وزیراعظم آکھیا جو کڄھ ویلاھ پہلے پاکستان دے ݙیوالے ہووݨ دیاں ڳالھیں تھیندیاں ہن، ملک کوں ڈیفالٹ توں بچاوݨ ہک وڈا چیلنج ہئی ٻھل اساں اے چیلنج قبول کر تے ملک توں ݙینھ رات محنت کر تے معاشی بحالی دی راہ تے سٹ ݙتے اتے سازشی عناصر منہ ݙیہدے رہ گئن۔ انہاں آکھیو جو حکومت دیاں قربانیاں نال آئی ایم ایف ساݙا ہتھ ونݙائے اتے ملک پائیدار ترقی دے رستے تے ٹر پئے، مہنگائی گھٹ تھیندی پئی اے اتے پالیسی ریٹ 22 فیصد توں گھٹ تھی تے ساݙھے 10 فیصد تئیں آ چکیے۔

وزیراعظم آکھیے جو فارن ایکسچینج ریزروز ڈبل تھی چکن، جیندے اچ دوست ممالک دے قرضے وی شامل ہن۔ انہاں چین، سعودی عرب، متحدہ عرب امارات اتے قطر دا شکریہ ادا کیتا جنہاں اوکھے ویلے مدد کیتی اے۔ وزیراعظم دا آکھݨ ہا جو قرضیاں نال ملک کیتے مشکلات تھیندن، اساں غربت اتے بیروزگاری تے قابو پاوݨے اتے برآمدات کوں ٻیا ودھاوݨے۔ انہاں آکھیا جو اساں نجی شعبے دی مشاورت نال پالیسیاں بݨائن اتے کاروباری برادری دا حکومت تے اعتماد خوش آئند اے۔ حکومت دا کم کاروبار کرݨ نئیں ٻھل سازگار ماحول ڈیوݨ اے، اتے برآمدات ای ترقی دا واحد رستہ اے، جیندے تے ساڈی پوری توجہ اے۔ وزیراعظم دفاعی اتے سفارتی محاذ تے کامیابیاں دا وی ݙسایا۔ انہاں آکھیا جو سفارتی اتے عسکری کامیابی دے بعد ہݨ معاشی کامیابی ساݙا وڈا چیلنج اے جیندے کیتے ݙینہہ رات کم کرݨا ہوسی۔ وزیراعظم آکھیا جو پی آئی اے دی نجکاری ہک شفاف طریقے نال تھئی اے اتے حکومت ایندی ترقی کیتے پورا تعاون کریسی۔ انہاں ڈسایا جو پی ڈبلیو ڈی، یوٹیلیٹی سٹورز اتے پاسکو کوں کرپشن اتے ناقص کارکردگی پاروں بند کر ݙتا ڳئے تاں جو حکومتی خرچے گھٹ تھی سگن۔ ڈیجیٹل والٹس دے ذریعے مستحقین کوں رمضان پیکج دے 16 ارب روپے ݙتے گئن اتے ایں سال 40 ارب روپے ڈیجیٹل طریقے نال ونݙیسوں۔ انہاں ٹیکس چوری دے خلاف کارروائی تے تعریف کریندے ٹیکس چوری کرݨ والیاں کوں خبردار کیتے جو ٹیکس ہر حال اچ ݙیوݨا ہوسی، کوئی معافی کائنا ملسی۔ انہاں آکھیا جو فیلڈ مارشل دے خصوصی تعاون نال سیاسی اتے عسکری قیادت مل تے فیصلے

کریندی پئی اے جیندے نال ترقی دے رستے کھلسن اتے پاکستان مضبوط تھیسی۔ وزیراعظم اعلان کیتے جو بجلی دا ٹیرف 4 روپے 4 پیسے فی یونٹ گھٹ کیتا ویسی، برآمد کنندگان کیتے ٹیکس ساݙھے 7 فیصد توں گھٹ کر کے ساݙھے 4 فیصد کیتا ویسی، ویلنگ چارجز وی گھٹ کیتے ویسن، ایکسپورٹ ری فنانسنگ دی شرح 7.5 توں گھٹ کر کے 4.5 فیصد کر ݙتی گئی اے، نمایاں کارکردگی والے برآمد کنندگان کوں ݙو سال کیتے “بلیو پاسپورٹ” تے “ایمبیسیڈر ایٹ لارج” دا درجہ ݙتا ویسی۔ چھیکڑ تے وزیراعظم لکی ٹیکسٹائل، صوفی انڈسٹریز، نوا ٹیکسٹائل سودھا کئی وݙے اداریاں کوں ایوارڈز وی ݙتن اتے بینکاں دے حکام کوں آکھیا جو او چھوٹے اتے درمیانے درجے دی صنعتاں کوں وی قرضے ݙیوݨ تاں جو معیشت دا پہیہ تیزی نال چل سگے اتے ملک خوشحال تھیوے۔