پاک بحریہ دیاں “سی گارڈز” مشقاں شروع، سمندری آلودگی مکاوݨ تے توجہ

کراچی۔2 فروری(اے پی پی) پاک بحریہ دیاں “سی گارڈز” مشقاں شروع تھی ڳن ڄیڑھیاں 9 فروری تئیں جاری رہسن۔ مشقاں دی افتتاحی تقریب دے مہمان خصوصی وائس ایڈمرل فیصل امین ہن۔ مشقاں اچ سمندری معاملات تے مکالمہ تھیسی اے عملی طور تے سمندر اچ مشقاں وی کیتیاں ویسن۔ “سی گارڈز 2026” دے دوران میرین سیکٹر کوں درپیش اوکھ تے ڳالھ مہاڑ کیتی ویسی۔ ایں سانڳے وائس ایڈمرل فیصل امین آکھیا جو مچھیاں پکڑݨ والیاں ٻیڑیاں (فشنگ بوٹس) تے “ویسل مانیٹرنگ سسٹم” لاوݨ دا منصوبہ تقریباً مکمل تھی چکیے، ماہی گیراں دی معلومات اتے انہاں دی کم کرݨ دی صلاحیت (استعداد) کوں ودھاوݨ وݙی لوڑھ اے۔ انہاں آکھیا جو ایں مشق دا ہک وڈا مقصد سمندری آلودگی دا خاتمہ اے، ایں پلیٹ فارم دے ذریعے میری ٹائم سیکٹر دے مختلف اداریاں اچ ہک ݙوجھے نال رابطہ بہتر تھئے۔ پاک بحریہ سمندر کوں صاف رکھݨ اتے مچھیاں پکڑݨ دے شعبے کوں جدید بݨاوݨ کیتے ہر سطح تے اپݨیاں سفارشاں پیش کریندی رہسی۔