پاکستان اچ معیاری فلماں دی تیاری کیتے ودھ اقدامات کیتے ویسن: عطا اللہ تارڑ

اسلام آباد۔2 فروری(اے پی پی) وفاقی وزیر اطلاعات و نشریات عطا اللہ تارڑ آکھیے جو پاکستان اچ معیاری فلماں ٻݨاوݨ کیتے حکومت ہر ممکن مدد اتے اقدامات کریسی۔ اے ڳالھ انہاں سنوار کوں “ڈائریکٹوریٹ آف الیکٹرانک میڈیا اینڈ پبلی کیشنز” (DEMP) دے منصوبیاں دے جائزہ اجلاس اچ آکھی۔ اجلاس اچ وفاقی وزیر کوں بریفنگ ݙتی گئی جو اے منصوبہ جنوری 2023 اچ شروع تھیا ہئی اے جون 2026 تئیں مکمل تھیسی۔ عطا اللہ تارڑ ایکوں ویلھے سر مکمل کرݨ تے زور ݙتا اتے آکھیا جو اے جدید منصوبہ بیانیہ ٻݨاوݨ تے رپورٹاں ٻݨاوݨ اوچ مددگار تھیسی۔ ایندے نال نجی شعبے کوں وی اپݨے مواد دا تجزیہ کرݨ اچ سہولت لٻھسی۔ نیشنل سینٹر آف فلمز (NCF): اجلاس اچ ݙسایا ڳیا جو DEMP دے فلم ونگ دی تنظیمِ نو کر تے “نیشنل سینٹر آف فلمز” ٻݨایا ڳئے۔ اے ادارہ فلم اتے ڈرامہ انڈسٹری دے اسٹیک ہولڈرز وچال رابطے بہتر ٻݨیسی اتے پاکستانی سینما کوں عالمی سطح تے متعارف کراوݨ کیتے کم کریسی۔ وفاقی وزیر کوں ݙسایا گیا جو فلمی صنعت دی بحالی کیتے حکومت مالی مراعات متعارف کرائن۔ ایندے اچ سینما دے آلات تے ٹیکس دی چھوٹ، فیچر فلمز دی تیاری کیتے ٹیکس ریلیف تے “فلم اینڈ ڈرامہ فنانس فنڈ” دے تحت ٹیکس کریڈٹ شامل ہین۔ اجلاس اچ ݙسایا ڳیا جو ݙوجھے ملکاں نال فلماں اتے ڈرامیاں دے تبادلے، مشترکہ پروڈکشنز اتے بین الاقوامی فلم فیسٹیولز اچ شرکت کیتے کئی معاہدیاں (MoUs) تے دستخط کیتے گئن۔ وفاقی وزیر آکھیا جو انڈسٹری دی بہتری کیتے باقاعدگی نال اجلاس کیتے ویسن تاں جو کہیں وی رکاوٹ کوں فوری دور کیتا ونجے۔