بلوچستان آپریشن اچ 177 دہشتگرد ماریے ڳن، تریمتیں اتے ٻالاں تے حملہ کرݨ آلیاں نال کوئی مذاکرات نہ تھیسن، وزیر دفاع خواجہ آصف

اسلام آباد۔ 2 فروری(اے پی پی) وفاقی وزیر دفاع خواجہ محمد آصف آکھیے جو بلوچستان آپریشن اچ 177 دہشت گرد مارے گئن، ڄݙاں جو 17 اہلکار اتے 33 شہری وی شہید تھئن۔ سنوار کوں قومی اسمبلی اجلاس اچ تفصیلات ݙسیندے ہوئے انہاں آکھیا جو پچھلے 24 گھنٹیاں اچ سکیورٹی فورسز دی کارروائی اچ 177 دہشت گرد جہنم واصل تھئن، ڄݙاں جو 10 پولیس اہلکار، 6 ایف سی اہلکار، ہک لیوی اہلکار اتے 33 شہری شہید تھئن۔ انہاں آکھیا جو بلوچستان اچ جرائم پیشہ افراد محرومیاں دا بیانیہ ٻݨیدن، ڄیڑھے دہشتگرد ماریے ویندے پین انہاں دا مسنگ پرسن اچ ناں اے، مسنگ پرسن مسقط، عمان، دبئی اچ ٻیٹھن اتے انہاں دے ٹٻر اِتھاں ریاست توں الاؤنس ڳھندے پئن۔ خواجہ آصف آکھیا جو کلبھوشن یادیو بلوچستان توں پکڑیا ڳئے، بھارت دہشت گردی اچ ملوث اے، دہشت گرداں کولو 20،20 لکھ روپے دی رائفل اے، دہشت گرد امریکی اسلحہ استعمال کریندن، دہشت گرداں اتے انہاں دے سہولت کاراں نال سختی نال نمٹیا ویسی۔ انہاں آکھیا جو تریمتیں اتے ٻالاں تے حملہ کرݨ آلیاں نال کوئی مذاکرات نہ تھیسن، پوری قوم کوں اپݨیاں مسلح افواج اتے سیکیورٹی فورسز دے نال کھڑا تھیوݨا ہوسی۔