وزیراعظم شہباز شریف نال لیبیا دے اعلیٰ سطح دے وفد دی ملاقات

اسلام آباد۔ 3 فروری(اے پی پی) پاکستان اتے لیبیا قریبی رابطے برقرار رکھݨ اتے مستقبل اچ تعاون دے نویں موقع ڳولݨ تے اتفاق کیتے، وزیراعظم محمد شہباز شریف لیبیا نال دوستانہ تعلقات کوں ودھاوݨ دے عزم دوہریندے ہوئیں مسلسل رابطیاں اتے ڳالھ مہاڑ دی اہمیت تے زور ݙتے۔ وزیراعظم محمد شہباز شریف نال لیبیا دے اعلیٰ سطح دے وفد منگل کوں وزیراعظم ہاؤس اسلام آباد اچ ملاقات کیتی اے۔ ایں وفد اچ لیبیا دی حکومت دے وزیراعظم ڈاکٹر اسامہ سعد حمد، لیبیا دی مسلح افواج دے کمانڈر اِن چیف فیلڈ مارشل خلیفہ ابو القاسم حفتر اتے نائب کمانڈر اِن چیف لیفٹیننٹ جنرل صدام خلیفہ حفتر شامل ہن۔ ایں موقع تے نائب وزیراعظم تے وزیرِ خارجہ سینیٹر محمد اسحاق ڈار اتے چیف آف آرمی سٹاف فیلڈ مارشل سید عاصم منیر وی موجود ہن۔

وزیراعظم آفس دے میڈیا ونگ دے مطابق، ملاقات اچ باہمی دلچسپی دے معاملیاں تے ڳالھ مہاڑ کیتی ڳئی اتے ݙوہیں ملکاں دے تعلقات کوں ٻیا تکڑا ٻݨاوݨ تے زور ݙتا ڳئے۔ ملاقات اچ مشترکہ معاملیاں اچ تعاون ودھاوݨ اتے علاقائی و عالمی سطح تے امن اتے ترقی دے عزم کوں دوہرایا ڳئے۔ وزیراعظم محمد شہباز شریف آکھیا جو پاکستان لیبیا نال برادرانہ تعلقات کوں ٻہوں اہمیت ݙیندے اتے مسلسل مکالمہ ݙوہیں ملکاں کیتے ضروری اے۔ لیبیا دی قیادت پاکستان دے کردار دی تعریف کیتی اتے ݙوہیں ملکاں وچال تعاون کوں مزید وسعت ݙیوݨ اچ دلچسپی ݙکھاعی۔ بیان دے مطابق ݙوہیں ملکاں مستقبل اچ تعاون دے امکانات ڳولݨ تے اتفاق کیتے، جیندے نال ݙوہیں ملکاں دے تعلقات ٻئے ودھسن۔