قازقستان دے صدر قاسم جومارت توکایووف دا وزیراعظم ہاؤس آوݨ تے پرجوش استقبال، گارڈ آف آنر پیش

اسلام آباد۔ 4 فروری(اے پی پی) قازقستان دے صدر قاسم جومارت توکایووف دا وزیراعظم ہاؤس پجݨ تے تپاک نال استقبال کیتا ڳئے۔ وزیراعظم محمد شہباز شریف معزز مہمان دا خیر مقدم کیتے، ݙوہیں رہنماواں گرمجوشی نال ہتھ ملایا۔ وزیراعظم ہاؤس آوݨ تے قازقستان دے صدر دے اعزاز اچ باضابطہ استقبالیہ تقریب تھئی، مسلح افواج دے چاق و چوبند دستے انہاں کوں گارڈ آف آنر پیش کیتا۔

قاسم جومارت توکایووف گارڈ آف آنر دا معائنہ کیتے۔ ایں موقع تے ݙوہیں ملکاں دے قومی ترانے وی وڄائے ڳئن۔ قازقستان دے صدر اپݨے وفد دے ممبراں دا وزیراعظم محمد شہباز شریف نال تعارف کرایا جݙاں جو وزیراعظم شہباز شریف کابینہ دے ممبراں کوں قازقستان دے صدر نال متعارف کرائے۔ قاسم جومارت توکایووف وزیراعظم ہاؤس دے احاطے اچ ٻوٹا وی لایا۔

قاسم جومارت توکایووف صدرِ مملکت آصف علی زرداری اتے وزیراعظم محمد شہباز شریف نال ملاقاتاں کریسن۔ ایں توں علاوہ او پاکستان قازقستان بزنس فورم نال خطاب وی کریسن۔ اے دورہ ݙوہیں ملکاں کیتے ݙوطرفہ تعلقات دا جامع جائزہ گھنݨ، تعاون دے نویں موقعیاں تے غور کرݨ بالخصوص تجارت، لاجسٹکس، علاقائی رابطہ کاری، عوامی رابطیاں دے فروغ اتے علاقائی و بین الاقوامی فورمز تے تعاون دے امکانات کوں لبھݨ دا اہم موقع ݙیسی۔ قازق صدر دا دورہ پاکستان اتے قازقستان وچال مضبوط تھیندے تعلقات دی عکاسی کریندے، تاریخی و ثقافتی قربتاں کوں موثر عملی تعاون اچ بدلݨ دے باہمی عزم کوں اڳونہا کریندے اتے خطے اچ امن و ترقی کیتے ݙوہیں ملکاں دی مشترکہ خواہش دی نمائندگی کریندے۔