پاکستان اتے قازقستان وچال تجارت، سرمایہ کاری، توانائی اتے صحت سودھا مختلف شعبیاں اچ تعاون ودھاوݨ کیتے 19 مفاہمتی یادداشتاں تے معاہدیاں تے دستخط

اسلام آباد۔ 4 فروری(اے پی پی) پاکستان اتے قازقستان وچال تجارت، سرمایہ کاری، توانائی، تعلیم، کھیݙ، ریلوے، مصنوعی ذہانت و ڈیجیٹل ترقی اتے صحت سودھا مختلف شعبیاں اچ تعاون ودھاوݨ کیتے 19 مفاہمتی یادداشتاں اتے معاہدیاں تے دستخط کر ݙتے گئن۔ وزیراعظم محمد شہباز شریف آکھیے جو پاکستان اتے قازقستان وچال تجارتی حجم ودھاوݨ دے ٻہوں ودھ موقعے ہن، ہک سال اچ ݙو طرفہ تجارت کوں ہک ارب ڈالر تئیں ڳھن ونڄݨ دا ہدف اے، مشترکہ کوششاں نال اقتصادی اتے تجارتی تعاون دے اہداف پورے کریسوں۔ مختلف شعبیاں اچ تعاون دے معاہدے تے مفاہمتی یادداشتاں ݙو طرفہ تعلقات کوں وسعت ݙیوݨ دے عزم دے عکاس ہن، سٹریٹجک شراکت داری دا معاہدہ وݙی اہمیت دا حامل اے، ݙوہیں ملک غزہ بورڈ آف پیس دے وی رکن ہین، دعاگو ہیں جو غزہ اچ مستقل امن اتے خوشحالی آوے۔ جݙاں جو قازقستان دے صدر قاسم جومارت توکایووف آکھیے جو پاکستان قازقستان دا قابل اعتماد دوست اتے سٹریٹجک شراکت دار اے، ݙوہیں ملکاں وچال تجارت و معیشت سودھا مختلف شعبیاں اچ تعاون کوں ودھارا ملدا پئے، ہک ارب ڈالر دا تجارتی ہدف حاصل کرݨ کیتے مل تے اڳو ودھسوں۔ خطے اچ امن و استحکام کیتے پاکستان دیاں کوششاں قابل تعریف ہن، دفاع دے شعبے اچ وی پاکستان دی ترقی عالمی سطح تے منی ویندی اے، پاکستان دے نال مختلف شعبیاں اچ تعاون ودھاوݨ چاہندے ہیں، پاکستانی سرمایہ کاراں کوں کاروبار کیتے پرکشش موقعے ݙیسوں۔ بدھ کوں وزیراعظم ہاؤس اچ پاکستان اتے قازقستان وچال مختلف شعبیاں اچ تعاون دی مفاہمتی یادداشتاں تے معاہدیاں دی دستاویزات دے تبادلیاں دی تقریب تھئی، جیندے اچ وزیراعظم محمد شہباز شریف اتے صدر قاسم جومارت توکایووف وی موجود ہن۔ پاکستان اتے قازقستان وچال کان کنی تے پٹرولیم، اقوام متحدہ دے امن دستیاں، قیدیاں دے تبادلے بارے معاہدے، میری ٹائم دے شعبے اچ مفاہمتی یادداشت، ٹرانزٹ ٹریڈ دے معاہدے، کسٹمز دے شعبے اچ تعاون دے معاہدے، ریلوے دے شعبے اچ تعاون دی مفاہمتی یادداشت، پلانٹ پروٹیکشن اتے ویٹرنری دے شعبیاں اچ تعاون، مصنوعی ذہانت تے ڈیجیٹل ترقی دے شعبے اچ تعاون دی مفاہمتی یادداشت، صحت دے شعبے اچ تعاون دی مفاہمتی یادداشت، اے پی پی اتے قازقستان دے سرکاری ٹی وی وچال تعاون دے معاہدے، موسمیاتی تبدیلی دے شعبے اچ تعاون دے معاہدے، اعلیٰ تعلیم دے شعبے اچ مفاہمتی یادداشت، مالیاتی نظم و نسق و بینکاری دے شعبے اچ مفاہمتی یادداشت، ثقافت دے شعبے اچ تعاون دے معاہدے، لاجسٹک دے شعبے اچ وی تعاون دے معاہدے، ورچوئل اثاثیاں دے شعبے اچ تعاون دے معاہدے، بندرگاہواں دے شعبے سودھا مختلف شعبیاں اچ تعاون دے فروغ کیتے 19 مفاہمتی یادداشتاں تے معاہدیاں دی دستاویزات دا تبادلہ کیتا ڳئے۔ وزیراعظم محمد شہباز شریف اتے قازقستان دے صدر قاسم جومارت توکایووف مشترکہ اعلامیے تے دستخط کیتن۔ ایں موقع تے الیندے ہوئے وزیراعظم محمد شہباز شریف آکھیا جو صدر قاسم جومارت توکایووف اتے انہاں دے وفد دا دورہ دا پاکستان خیر مقدم کریندے جیڑھا ݙوہیں ملکاں دے تعلقات کوں نویں جہت ݙیوݨ کیتے ٻہوں اہم اے، قازقستان دے کہیں صدر دا 23 سال بعد پاکستان دا اے پہلا دورہ اے۔ صدر قاسم جومارت توکایووف نال تعمیری اتے مثبت ڳالھ مہاڑ کیتی اے۔ وزیراعظم محمد شہباز شریف آکھیا جو طے پاوݨ والی مفاہمتی یادداشتاں تے معاہدیاں کوں عملی شکل ݙیوݨ کیتے پرعزم ہیں، معاہدیاں دے حقیقت دا روپ دھارݨ نال معاشی اتے ثقافتی تعاون ودھسی۔ قازقستان دے صدر قاسم جومارت توکایووف آکھیا جو بھرپور استقبال اتے شاندار مہمان نوازی تے پاکستان دی حکومت اتے عوام دا مشکور ہاں، دوست ملک پاکستان دے دورے تے ٻہوں خوشی اے، پاکستان قازقستان دا قابل اعتماد دوست تے سٹریٹجک شراکت دار اے، ݙوہیں ملک مشترکہ اقدار و روایات دے امین ہین۔ انہاں آکھیا جو ݙوہیں ملکاں دے تعلقات مضبوط بݨاوݨ اچ وزیراعظم محمد شہباز شریف دے اہم کردار دا معترف ہاں، وزیراعظم محمد شہباز شریف نال ٻہوں مثبت اتے تعمیری ڳالھ مہاڑ تھئی اے۔ انہاں آکھیا جو اے دورہ ݙوہیں ملکاں دے تعلقات اچ نویں باب دا آغاز اے۔