پاکستان اتے قازقستان دا تزویراتی شراکت داری قائم کرݨ دا فیصلہ، تجارتی حجم ہک ارب ڈالر تئیں ودھاوݨ تے اتفاق، مشترکہ اعلامیہ

اسلام آباد۔ 4 فروری(اے پی پی) پاکستان اتے قازقستان تزویراتی شراکت داری (اسٹریٹجک پارٹنرشپ) قائم کرݨ دا فیصلہ کیتے جیندے اچ سیاسی مکالمے، سلامتی و دفاع، تجارت، معیشت، سرمایہ کاری، ٹرانسپورٹ، لاجسٹکس، تعلیم، سائنس، آئی ٹی، ثقافت، میڈیا، کھیڈ، سیاحت اتے موسمیاتی تبدیلی سودھا اہم شعبیاں تے توجہ رکھی گئی اے۔ ݙوہیں ملکاں آندے سالاں اچ ݙوطرفہ تجارت دا حجم ہک ارب امریکی ڈالر تئیں ودھاوݨ تے وی اتفاق کیتے۔ بدھ کوں وزارتِ خارجہ ولوں قازقستان دے صدر قاسم جومارت توکایووف اتے وزیراعظم محمد شہباز شریف وچال تھیوݨ والے مذاکرات دے بعد جاری تھیوݨ والے مشترکہ اعلامیے اچ آکھیا ڳئے جو وزیراعظم شہباز شریف دی دعوت تے قازق صدر دا 23 سال بعد پاکستان دا اے سرکاری دورہ ہک تاریخی سنگِ میل دی حیثیت رکھدے۔

اعلامیے دے مطابق پاکستان قازقستان دی آزادی کوں منݨ والے اولین ملکاں اچ شامل اے۔ ݙوہیں رہنماواں نائب وزیراعظم و وزیر خارجہ دی سطح تے ہر ݙو سال بعد تزویراتی مکالمے (اسٹریٹجک ڈائیلاگ) تے اتفاق کیتے۔ ایندے توں علاوہ پارلیمانی رابطیاں تے ویزہ سسٹم اچ نرمی بشمول پاکستان کوں قازقستان دے ای-ویزا سسٹم اچ شامل کرݨ تے وی اتفاق تھئے۔ اعلامیے اچ ایں ڳالھ تے زور ݙتا ڳئے جو خطے دے سارے تصفیہ طلب مسائل دا حل یکطرفہ رویے دی بجائے پرامن طریقے نال لٻھݨا چاہیدے۔ دہشت گردی، منشیات دی سمگلنگ، منظم جرائم اتے سائبر خطرات دے خلاف تعاون ودھاوݨ تے اتفاق تھئے۔ قازق صدر اقوام متحدہ دی سلامتی کونسل اچ پاکستان دے کردار دی تعریف کیتی اے۔

مشترکہ فوجی مشقاں اتے تربیتی پروگراماں کوں جاری رکھݨ دا وی فیصلہ کیتا ڳئے۔ ݙوہیں فریقین زراعت، ٹیکسٹائل، مشینری، کیمیکل، توانائی، فارماسیوٹیکل اتے کھیݙاں دے سامان دے شعبیاں اچ تعاون ودھاوݨ تے اتفاق کیتے۔ تجارتی حجم کوں ہک ارب ڈالر تئیں پجاوݨ کیتے 2025 توں 2027 تئیں دا ہک جامع روڈ میپ تیار کیتا گئے۔ قازق انویسٹ اتے بورڈ آف انویسٹمنٹ پاکستان وچال سرمایہ کاری اچ سہولت کیتے مفاہمتی یادداشت تے عملدرآمد یقینی بݨایا ویسی۔

اتفاق تھئے جو “قازقستان-ترکمانستان-افغانستان-پاکستان” اتے “قازقستان-ازبکستان-افغانستان-پاکستان” ریل و روڈ رابطیاں کوں خطے دی خوشحالی کیتے اہم اے جیندے کم تیکھا کیتا ویسی۔ وزیراعظم شہباز شریف ٹرانس افغان ریلوے کوریڈور اچ قازقستان دی دلچسپی دا خیر مقدم کیتے۔ مستقبل قریب اچ ݙوہیں ملکاں وچال براہِ راست پروازاں شروع کرݨ دے امکان تے وی غور کیتا ویسی۔ آکھیا قئے جو آئی ٹی اتے تعلیم دے شعبے اچ تعاون کیتے ورکنگ گروپس ٻݨائے ڳئن۔ قازق صدر پاکستانی طلباء کوں قازق یونیورسٹیاں اچ تعلیم دی دعوت ݙتی اے۔ اسلام آباد دیاں مختلف یونیورسٹیاں اچ الفارابی، ستبایوف اتے احمد یاساوی ریسرچ سنٹرز دا قیام عمل اچ ڳھن آیا گئے۔

نادرا اتے قازق آئی ٹی ادارے وچال وی تعاون دا معاہدہ تھئے۔ ایویں ہی تبدیلی اتے علاقائی امور ڄیویں موسمیاتی تبدیلی اتے گلیشیئرز دے پڳھرݨ کوں ہک مشترکہ چیلنج قرار ݙیندے ہوئیں تعاون ودھاوݨ تے اتفاق کیتا ڳئے۔ اعلامیے اچ آکھیا ڳئے جو جنوبی ایشیا اچ پائیدار امن کیتے جموں و کشمیر دے مسئلے دا اقوام متحدہ دی قرارداداں دے مطابق حل ضروری اے۔ افغانستان دے حوالے نال ایں ڳالھ دا اعادہ کیتا گیا جو افغان سرزمین کہیں ٻئے ملک دے خلاف استعمال نئیں تھیوݨی چاہیدی۔ آخر اچ صدر قاسم جومارت توکایووف وزیراعظم شہباز شریف کوں قازقستان دے دورے دی دعوت ݙتی جیہڑی انہاں شکریہ دے نال قبول کر گھدی اے۔