بلوچستان اچ آپریشن رد الفتنہ-1 مکمل، بھارتی سرپرستی اچ پلݨ والے 216 دہشت گرد جہنم واصل

راولپنڈی۔ 5 فروری(اے پی پی) سکیورٹی فورسز بلوچستان اچ “آپریشن رد الفتنہ-1” کامیابی نال مکمل کر ڳھدے، انٹیلی جنس بیسڈ کارروائیاں اچ 216 دہشت گرداں ماریے ڳن اتے دشمن دے کمانڈ اینڈ کنٹرول سسٹم کوں مفلوج کر ݙتا ڳئے۔ اے آپریشن “فتنہ الہندوستان” ولوں صوبے دے امن اتے ترقیاتی منصوبیاں کوں سبوتاژ کرݨ دی منظم سازشاں دے خلاف ہک موثر اتے تکڑا ولدا اے، ڄئیں دہشت گرداں دے سلیپر سیلز دا خاتمہ کیتے اتے ریاست دا اے عزم وی ݙکھا ݙتے جو ملکی سلامتی اتے معصوم شہریاں دے تحفظ تے کوئی سمجھوتہ نا کیتا ویسی۔ آئی ایس پی آر دے مطابق 29 جنوری 2026 کوں ضلع پنجگور اتے ہرنائی دے مضافات اچ معتبر اطلاعات دی بنیاد تے آپریشنز شروع کیتے ڳئے جتھاں دہشت گرداں دی موجودگی نال مقامی آبادی کوں شدید خطرات لاحق ہن۔ سکیورٹی فورسز دہشت گرداں دیاں کمیں گاہواں کوں نشانہ بݨایا جیندے نتیجے اچ بھارتی پراکسی نیٹ ورکس نال وابستہ 41 دہشت گرد ہلاک کر ݙتے گئے، سکیورٹی فورسز دے دلیرانہ ردِ عمل بلوچستان دے امن کوں غیر مستحکم کرݨ کیتے “فتنہ الہندوستان” دی مایوسانہ کوششاں کوں مٹی اچ ملا ݙتا۔ ایں سانڳے دہشت گرداں دے سلیپر سیلز دے خاتمے کیتے کئی علاقیاں اچ کومبنگ اتے کلیئرنس آپریشنز دا دائرہ کار وسیع کر ݙتا گیا۔ آپریشن رد الفتنہ-1 اچ سکیورٹی فورسز اتے قانون نافذ کرݨ والے اداریاں خفیہ ایجنسیاں دے تعاون نال بالکل درستگی اتے عزم نال بھرپور جواب ݙتا۔ انہاں مربوط کارروائیاں اچ مجموعی طور تے 216 دہشت گرد جہنم واصل تھئے جیندے نال دہشت گرد نیٹ ورکس دی قیادت، کمانڈ اینڈ کنٹرول تے آپریشنل صلاحیتوں کوں کاری ضرب لڳی، کارروائیاں دے دوران بھاری مقدار اچ غیر ملکی اسلحہ، گولہ بارود اتے دھماکہ خیز مواد وی برآمد تھیا۔ ابتدائی تجزیے توں انہاں انتہا پسنداں کوں حاصل منظم بیرونی معاونت اتے لاجسٹک مدد دے شواہد ملین۔ انہاں آپریشنز دے دوران تریمتیں اتے ٻالاں سودھا 36 معصوم شہری شہید تھئے جݙاں جو ملک دے دفاع اتے شہریاں دے تحفظ دی خاطر سکیورٹی فورسز اتے قانون نافذ کرݨ والے اداریاں دے 22 جری جواناں جامِ شہادت نوش کیتا۔ پوری قوم انہاں شہدا دی قربانیاں کوں سلام پیش کریندی اے اتے انہاں دے خانداناں دے نال کھڑی اے۔ پاکستان دی مسلح افواج نیشنل ایکشن پلان دے تحت دہشت گردی دے مکمل خاتمے تئیں اپݨیاں کارروائیاں پوری قوت نال جاری رکھسن، آپریشن رد الفتنہ-1 پاکستان اتے بالخصوص بلوچستان دے غیور عوام دے ایں عزم دا ثبوت اے جو او ہمیشہ تشدد اتے امن، انتشار اتے اتحاد تے تباہی اتے ترقی کوں ترجیح ݙیسن۔