وزیرِ اعظم دا آپریشن رد الفتنہ دی کامیابی تے سکیورٹی فورسز کوں خراجِ تحسین

اسلام آباد۔ 5 فروری (اے پی پی) وزیرِ اعظم محمد شہباز شریف فتنہ الہندوستان ولوں بلوچستان دے امن کوں سبوتاژ کرݨ دے ناپاک عزائم کوں خاک اچ ملاوݨ کیتے سکیورٹی فورسز دے آپریشن رد الفتنہ دی کامیابی تے سکیورٹی فورسز دے افسران و اہلکاراں اتے افواجِ پاکستان دی قیادت کوں خراجِ تحسین پیش کیتے۔ وزیرِ اعظم محمد شہباز شریف آپریشن اچ بلوچستان دے امن و ترقی دے دشمناں دی کنݙھ ٻھنݨ اتے مجموعی طور تے 216 دہشت گرداں کوں جہنم واصل کرݨ تے سکیورٹی فورسز دی پیشہ ورانہ صلاحیتاں دی تعریف کیتی۔ انہاں دہشت گرداں دی معصوم شہریاں دے خلاف کارروائیاں دے دوران تریمتیں اتے ٻالاں سودھا 36 افراد دی شہادت تے ݙاݙھا ݙکھی تھیندے شہید تھیوݨ آلے 22 سکیورٹی اہلکاراں کوں خراجِ عقیدت پیش کیتا۔ انہاں آکھیا جو قوم اپݨے شہدا دی قربانی کݙاہیں وی نا بھلسی، بلوچستان دے معصوم شہریاں کوں نشانہ بݨا تے دہشت گرداں اے ثابت کر ݙتے جو اے بلوچستان دی ترقی و خوشحالی اتے عوام دے دشمن ہین، دہشت گردی دی عفریت دے ملک توں مکمل خاتمے تئیں ایندے خلاف جنگ جاری رکھسوں، وطنِ عزیز دی حفاظت دے غیر متزلزل عزم اچ پوری قوم افواجِ پاکستان دے نال کھڑی اے۔