فیلڈ مارشل سید عاصم منیر دا مظفرآباد دا دورہ، کشمیری شہداء کوں خراجِ عقیدت

راولپنڈی۔ 5 فروری(اے پی پی) چیف آف ڈیفنس فورسز و آرمی چیف فیلڈ مارشل سید عاصم منیر مظفرآباد دا دورہ کیتا۔ انہاں تحریکِ آزادی کشمیر دے شہداء کوں خراجِ عقیدت پیش کریندے ہوئیاں جموں و کشمیر شہداء یادگار تے پُھلاں دی چادر چڑھائی اتے شہداء دی عظیم قربانیاں کوں سراہیا۔ معززین اتے سابق فوجیاں نال الیندے فیلڈ مارشل سید عاصم منیر مقبوضہ جموں و کشمیر دے عوام کیتے پاکستان دی غیر متزلزل سیاسی، اخلاقی تے سفارتی حمایت دا اعادہ کیتا۔ انہاں آکھیا جو بھارتی مظالم، انسانی حقوق دی سنگین خلاف ورزیاں تے ہندوتوا نظریے دے تحت کیتیاں ونڄݨ والیاں زیادتیاں کشمیری عوام دی جائز جدوجہد تے انہاں دے عزم کوں کمزور کرݨ اچ ناکام رہین،

کشمیر تیکھے عوامی خواہشات تے انہاں دی تقدیر دے مطابق آزادی دی سویل ݙیکھسی۔ انہاں مزید آکھیا جو پاکستان اقوامِ متحدہ دی سلامتی کونسل دی قرارداداں دے مطابق مسئلہ کشمیر دے منصفانہ حل تائیں سارے عالمی فورمز تے کشمیری عوام دے حقِ خودارادیت دی آواز چیندا رہسی اتے اپݨے کشمیریاں نال مکمل یکجہتی کریسی۔ چیف آف ڈیفنس فورسز کشمیر اچ تعینات افسران اتے جواناں دی بلند حوصلگی، پیشہ ورانہ مہارت، غیر متزلزل عزم اتے مشکل حالات اچ اعلیٰ سطح دی جنگی تیاری کوں سراہیا۔ انہاں ہر قسم دی ممکنہ جارحیت دے مؤثر سدِباب کیتے ہمہ وقت چوکسی، اعلیٰ آپریشنل تیاری اتے سارے شعبیاں اچ مربوط ہم آہنگی برقرار رکھݨ تے زور ݙتا۔ انہاں ہک اڳلے مورچے دا وی دورہ کیتا جتھاں انہاں محاذِ اول تے تعینات جواناں نال ملاقات کیتی۔ انہاں واضح کیتا جو کہیں وی جارحیت دا فوری، بھرپور تے مؤثر جواب ݙتا ویسی اتے مسلح افواج بدلدے ہوئے سکیورٹی ماحول اچ روایتی تے ہائبرڈ خطرات نال نمٹݨ کیتے مکمل طور تے تیار ہن۔ ایں توں پہلے مظفرآباد پڄݨ تے چیف آف ڈیفنس فورسز و آرمی چیف فیلڈ مارشل سید عاصم منیر دا استقبال کمانڈر راولپنڈی کور کیتا۔