ازبک صدر دا گلوبل انڈسٹریل اینڈ ڈیفنس سلوشنز دا دورہ، دفاعی تعاون ودھاوݨ دا عزم

راولپنڈی:۔ 5 فروری(اے پی پی) صدرِ ازبکستان شوکت مرزائیوف سینئر وزراء نال پاکستان دے اہم دفاعی و صنعتی ادارے گلوبل انڈسٹریل اینڈ ڈیفنس سولوشنز(GIDS) دا دورہ کیتے۔ ݙوہیں ملکاں دفاع، ٹیکنالوجی اتے صنعتی شعبیاں اچ تعاون ودھاوݨ دا عزم دوہرائے۔ آئی ایس پی آر دے مطابق چیف آف آرمی سٹاف و چیف ڈیفنس سٹاف فیلڈ مارشل سید عاصم منیر صدر شوکت مرزائیوف اتے انہاں دے وفد دا استقبال کیتا اتے ادارے دا دورہ کروایا۔ انہاں ازبک صدر کوں GIDS دے مختلف شعبیاں تے بریفنگ ݙتی، جیندے اچ جدید دفاعی حل، صنعتی صلاحیتاں اے تکنیکی ایجادات شامل ہن۔ صدر تے انہاں دے وفد اہم سہولتاں دا معائنہ کیتا اتے پاکستان اچ مقامی دفاعی پیداوار اتے صنعتی ترقی دے مختلف شعبیاں کوں ݙٹھا۔ ݙوہاں زور ݙتا جو دفاع، ٹیکنالوجی اتے صنعتی شعبیاں اچ شراکت داری، علم دے تبادلے اتے مشترکہ منصوبیاں کوں فروغ ݙیوݨ انتہائی اہم اے۔ انہاں تعلقات کوں مزید مستحکم بݨاوݨ اتے خطے اچ تعاون دے نویں رستے کھولݨ تے اتفاق کیتا۔