پاکستان تے ازبکستان دا تجارت دا حجم ݙو ارب ڈالر تئیں ودھاوݨ تے اتفاق، علاقائی روابط کیتے ہک ٻئے دا ہتھ ونݙایا ویسی، شہباز شریف

اسلام آباد۔ 5 فروری(اے پی پی(پاکستان اتے ازبکستان ݙو طرفہ تجارت دا حجم پنڄ سال اچ ݙو ارب ڈالر تئیں ودھاوݨ تے اتفاق کریندے مختلف شعبیاں اچ ڳانݙھا تکڑا کرݨ لو ایکشن پلان ٻݨآوݨ دا فیصضہ کیتے۔ اے فیصلہ اسلام آباد اچ پاکستان اتے ازبکستان وچال مختلف شعبیاں اچ تعاون ودھاوݨ کیتے مفاہمتی یادداشتاں اتے معاہدیاں تے دستخطاں دی تقریب ویلھے وزیر اعظم شہباز شریف اتے ازبکستان دے صدر دی ملاقات اچ تھیا۔ ایں موقع تے اپݨے خطاب اچ وزیرِ اعظم آکھیا جو ازبکستان دے صدر اتے انہاں دے وفد کوں اسلام آباد اچ اپݨے ݙوجھے گھر آوݨ تے خوش آمدید آہداں، انہاں دے دورے تے ٻہوں خوشی اے، نہ صرف ازبکستان دے ٻھیݨ ٻھراواں ٻھل ہمسایہ ملکاں نال امن، ترقی اتے خوشحالی کیتے شاندار کوششاں تے نسٹ اسلام آباد ولوں ازبکستان دے صدر کوں ڈاکٹریٹ دی اعزازی ڈگری اتے پروفیسر شپ ݙتی گئی اے۔ پاکستان تے ازبکستان دے تعلقات ودھاوݨ اتے تجارتی و اقتصادی روابط دے فروغ کیتے خدمات تے پاکستان دا اعلیٰ ترین سول ایوارڈ “نشانِ پاکستان” ملݨ تے وی مبارکباد ݙینداں۔ گزریل سال فروری اچ ازبکستان دے دورے ویلھے شاندار میزبانی تے استقبال اڄ وی یاد اے، پاکستان تے ازبکستان دے تاریخی برادرانہ تعلقات ہن، جیڑھے سلک روٹ نال جڑے ہوئن اتے سمرقند و بخارا نال ہک تکڑا تعلق ایں تسبیھ دا دانݨہ اے۔ اے تاریخی حقائق ساݙے قریبی تعلقات اتے شاندار مستقبل دے عکاس ہن، ݙو طرفہ تعلقات دی مضبوطی کیتے مہمان صدر دے کردار کوں قدر نال ݙیہداں۔ انہاں آکھیا جو پاکستان اتے ازبکستان دے تعلقات روز ݙیہاڑی پہلے توں تکڑے تھیندے پین، اساں اعلیٰ سطح تزویراتی تعاون کونسل دے افتتاحی اجلاس دی صدارت کیتی، علاقائی روابط دے فروغ دے حوالے نال مکمل تعاون کیتا ویسی، مختلف شعبیاں اچ تعاون ودھاوݨ کیتے مل تے کم کریسوں، زراعت، فارماسیوٹیکل، لیدر، لیدر شوز، سیاحت، آئی ٹی، ٹیکسٹائل اتے ٻئے شعبیاں اچ تعاون ودھایا ویسی، ݙوہاں ملکاں وچال مختلف شعبیاں اچ تعاون ودھاوݨ کیتے ورکنگ گروپ بݨاوݨ تے اتفاق تھئے۔ ݙو طرفہ تجارت ودھاوݨ دا پروٹوکول ݙاݙھا اہم سنگِ میل اے جیڑھا ہک “گیم چینجر” ثابت تھیسی، ایکشن پلان تے عمل درآمد کیتے سہ ماہی بنیاد تے اجلاس تھیسی، پنج سالہ پلان دے تحت تعاون دیاں نویاں راہیں ڳولیاں ویسن، قریبی روابط دے ذریعے تعاون کوں عملی شکل ݙیندے ہوئے اڳو ودھݨے۔ بابر پارک دے تحفے تے پاکستان دے عوام اتے حکومت ولوں مشکور ہیں۔

انہاں آکھیا جو ازبکستان وی پاکستان نال غزہ امن بورڈ دا رکن اے، غزہ اچ امن دی بحالی اتے تعمیرِ نو کیتے اے ہک اہم فورم اے، امید اے جو صدر ٹرمپ دی سربراہی اچ غزہ اچ پائیدار امن اتے تعمیرِ نو کیتے کامیاب تھیسوں اتے ݙو ریاستی حل تئیں پڄیا ویسی، اساں نہ صرف ݙوہیں ملکاں ٻھل پورے خطے اچ امن اتے ترقی کیتے کم کریسوں۔ کشمیر اتے فلسطین دے مسئلیاں دا حل دیرپا امن کیتے ضروری اے۔ ایں موقع تے ازبکستان دے صدر نے خیر مقدمی کلمات تے کھڑے تھی تے وزیرِ اعظم محمد شہباز شریف نال اظہارِ تشکر کیتا۔ ازبکستان دے صدر شوکت مرزائیوف آکھیا جو سوھݨے استقبال اتے شاندار میزبانی تے وزیرِ اعظم محمد شہباز شریف دا مشکور ہاں، اینڄھے بالکل تاریخی ہوندن، اے ݙینھ وی یادگار اے، ڈاکٹریٹ دی ڈگری تے پروفیسر شپ ملݨ میݙے کیتے اعزاز اے، ڄیویں ساݙی شاندار میزبانی تھئی اے او ݙسا نئیں سڳدا، میں ہدایت کیتی اے جو ازبکستان دی مائننگ یونیورسٹی اچ نسٹ چیئر قائم کیتی ویسی۔ ݙوہیں ملکاں وچال تعاون ودھایا ویسی، تعلیم، سائنس اتے ٹیکنالوجی دے شعبیاں اچ تعاون نال منزلاں طے کریسوں، تعلیمی شعبے اچ اساتذہ اتے طلباء دا وی تبادلہ کیتا ویسی۔ پاکستان دا اعلیٰ ترین اعزاز “نشانِ پاکستان” ݙیوݨ تے شکر گزار ہاں جیڑھا ݙوطرفہ سنڳت دی مثال اے، نشانِ پاکستان دا اعزاز میݙے کیتے وݙے ماݨ دی ڳالھ اے، تجارت، معیشت، سکیورٹی، دفاع، سرمایہ کاری سودھا سارے شعبیاں اچ روابط ودھاوݨ تے الائے، مشترکہ ورکنگ گروپ دا قیام اہم اے۔ ݙوہان رہنماواں مذاکرات اچ ݙو طرفہ تعلقات دے مختلف پہلوواں دا تفصیلی جائزہ گھدے۔ انہاں آکھیا جو پاکستان تیزی نال ترقی کریندا پئے، تعمیری ڳالھ مہاڑ دے نتیجے اچ اساں تجارتی حجم ودھاوݨ دے پروٹوکول تے دستخط کیتن، وزیرِ اعظم شہباز شریف دی قیادت اچ معاشی استحکام اتے ترقی کیتے کوششاں قابلِ تعریف ہین۔ انہاں آکھیا جو فلسطین سودھا مختلف معاملیاں تے ازبکستان اتے پاکستان مل تے اڳو ودھسن، اساں متحد تھی تے اڳوں ودھوں تاں سارے اوکھ اتے مسئلیاں تے قابو پا سڳدے ہیں۔ اپݨے وݙکیاں دے ناں تے اسلام آباد اچ “بابر پارک” دے قیام دی تجویز نال اتفاق کرݨ تے شکر گزار ہاں۔ بابر پارک ساݙی قریبی دوستی اتے مضبوط برادرانہ تعلقات دا عکاس ہوسی۔ انہاں آکھیا جو عالمی اتے علاقائی معاملیاں تے مل تے اڳوں ودھݨ کیتے پرعزم ہیں۔ ایں توں پہلے وزیرِ اعظم محمد شہباز شریف اتے ازبکستان دے صدر شوکت مرزائیوف ݙو طرفہ تجارت دا حجم اڳلے پنڄ سال اچ ݙو ارب ڈالر تائیں ودھاوݨ دے پروٹوکول تے مختلف شعبیاں اچ تعاون کوں وسعت ݙیوݨ کیتے ایکشن پلان ٻݨاوݨ لو ورکنگ گروپ قائم کرݨ دی دستاویز تے دستخط کیتے۔ ریکٹر نیشنل یونیورسٹی آف سائنسز اینڈ ٹیکنالوجی (نسٹ) ازبکستان دے صدر کوں پی ایچ ڈی دی اعزازی ڈگری اتے پروفیسر شپ ݙیوݨ دا اعلان کیتا۔ وزیرِ اعظم شہباز شریف، شوکت مرزائیوف کوں اعزازی ڈگری تے پروفیسر شپ دا سرٹیفکیٹ عطا کیتا۔