نجی شعبیاں دی 3 ارب 40 کروڑ ڈالر دے سمجھوتیاں تے عملدرآمد اہم پیشرفت، پاکستان-ازبکستان بزنس فورم نال وزیراعظم شہباز شریف اتے ازبک صدر دا خطاب

اسلام آباد۔ 6 فروری(اے پی پی)وزیراعظم محمد شہباز شریف اتے ازبکستان دے صدر شوکت مرزائیوف کاروباری برادری دے کردار کوں ݙوہیں ملکاں دے معاشی تعلقات دے ودھارے کیتے اہم قرار ݙیندے یقین ݙوایا اے جو کاروبار دی راہ اچ آوݨ والیاں رکاوٹاں کوں دور کیتا ویسی۔ ݙوہیں ملکاں دے سرمایہ کار کاروباری موقعیاں توں فائدہ چا تے عالمی مارکیٹ اچ اپݨی ڄاہ ٻما سڳدن، آپسی نجی شعبیاں وچال 3 ارب 40 کروڑ ڈالر دے سمجھوتیاں تے عملدرآمد اہم پیشرفت اے۔

اسلام آباد اچ پاکستان اتے ازبکستان دے تجارتی حجم اچ ودھارے اتے کاروباری سرگرمیاں دے فروغ بارے “پاکستان-ازبکستان بزنس فورم” نال خطاب کریندے پئے ہن۔ وزیراعظم محمد شہباز شریف آکھیا جو تاشقند بزنس فورم دے بعد کیتی ونڄݨ والی اصلاحات دے نتیجے اچ ݙوطرفہ تجارت دا حجم گزریل سال ودھ تے 450 ملین ڈالر تئیں پڄ ڳئے۔ وزیراعظم آکھیا جو نجی شعبیاں وچال 3 ارب 40 کروڑ ڈالر دے معاہدیاں تے عملدرآمد ہک ٻہوں وݙی کامیابی اے۔ وزیراعظم آکھیا جو باہمی تجارت دا حجم 2 ارب ڈالر تئیں گھن ونڄݨ اتے سائنس و ٹیکنالوجی، توانائی، زراعت اتے ٹیکسٹائل دے شعبیاں اچ تعاون ودھاوݨ تے اتفاق تھئے۔ انہاں آکھیا جو حکومت مہنگائی دی شرح کوں 30 فیصد توں گھٹ کر تے ہک ہندسے (Single Digit) تئیں آن کھڑائے اتے پالیسی ریٹ اچ وی نمایاں کمی تھئی اے۔

وزیراعظم آکھیا جو پاکستان دے ٹیکسٹائل برآمد کنندگان ازبکستان اچ پلانٹ لاوݨ چاہندن جیندے نال ݙوہیں ملکاں کوں فائدہ تھیسی۔ انہاں یقین ݙوایا جو بیوروکریسی کہیں قسم دی رکاوٹ نا بݨسی اتے کاروبار کوں “سرخ فیتے” (Red Tape) دی نذر نا تھیوݨ ݙتا ویسی۔ ازبکستان دے صدر شوکت مرزائیوف بزنس فورم نال خطاب کریندے ہوئیں آکھیا جو کاروباری طبقہ ݙوہیں ملکاں وچال رابطے دا ذریعہ اے، انہاں کوں ہر طرح دی سہولت ݙتی ویسی۔ انہاں وزیراعظم شہباز شریف دی قیادت کوں سراہندے آکھیا جو ݙوہیں ملکاں دے سرمایہ کار ہک ݙوجھے دے تجربیاں توں فائدہ چیندے پئے ہن۔ انہاں اعلان کیتا جو پاکستانی تاجراں کیتے 10 سال تئیں ٹیکس توں استثنیٰ (Tax Exemption) ݙتا ویسی۔ انہاں آکھیا جو صحت دے شعبے اچ بھرپور تعاون کیتا ویسی اتے سال 2026ء باہمی شراکت داری دے فروغ دا سال تھیسی۔بزنس فورم دے دوران ٹیکسٹائل مصنوعات دی پیداوار، تاشقند لیدر زون دا قیام، معدنیات، زراعت، لائیوسٹاک اتے طبی شعبیاں اچ تعاون دے حوالے نال مختلف دستاویزات دا تبادلہ وی کیتا گیا۔