پاکستان اتے کینیڈا وچال ݙوطرفہ سیاسی مشاورت دا چھیواں دور تھئے، دفتر خارجہ

اسلام آباد۔ 7 فروری(اے پی پی) پاکستان اتے کینیڈا وچال ݙوطرفہ سیاسی مشاورت دا چھیواں دور اسلام آباد اچ تھئے۔ پاکستان ولوں وزارت خارجہ دے خصوصی سیکرٹری (اقوامِ متحدہ) نبیل منیر، ڈائریکٹر جنرل (امریکاز) دے نال مشاورت اچ شریک تھئے ڄݙاں جو کینیڈین وفد دی قیادت گلوبل افیئرز کینیڈا دے اسسٹنٹ ڈپٹی منسٹر (انڈو پیسفک) ویلڈن ایپ کیتی جنہاں دے نال اسلام آباد اچ کینیڈا دے ہائی کمشنر طارق علی خان وی ہن۔ ہفتے کوں دفتر خارجہ دے مطابق فریقین پاکستان دے نائب وزیرِ اعظم و وزیرِ خارجہ اتے کینیڈا دے وزیرِ خارجہ وچال حالیہ بامعنی روابط پاروں ݙوطرفہ تعلقات اچ مسلسل پیش رفت تے اطمینان کیتا جیندے نال اعلیٰ سطح روابط شراکت داری کوں سٹریٹجک رہنمائی اتے نویں رفتار ملی اے۔ انہاں باہمی تعلقات کوں ٻیا مضبوط بݨاوݨ دے عزم دا وی اعادہ کیتا، ایں سانڳے فریقین موجودہ معاہدیاں دے موثر نفاذ کوں بہتر بݨاوݨ اتے تعاون دے نویں شعبیاں دی نشاندہی تے آمادگی ݙکھائی۔ انہاں تجارت اتے سرمایہ کاری، زراعت تے زرعی ٹیکنالوجی، کان کنی تے معدنیات، توانائی، ماحولیاتی تبدیلی، مصنوعی ذہانت تے انفارمیشن و کمیونیکیشن ٹیکنالوجی، ہنرمند افرادی قوت دی ترقی، تعلیم تے تحقیق، سیاحت تے عوامی روابط کوں اڳو تے ٹورݨ کیتے اہم قرار ݙتے۔ انہاں عالمی اتے علاقائی صورتحال، باہمی دلچسپی دے اہم کثیرالجہتی امور تے الایا۔