بھارت دہشتگرداں کوں فنڈنگ اتے ٹارگٹس ݙیندا پئے، اسلام آباد حملے دی منصوبہ بندی افغانستان اچ تھئی، دھماکے دے ماسٹر مائنڈ تے سہولت کاراں کوں پکڑ گھدے، محسن نقوی

اسلام آباد۔ 7 فروری(اے پی پی) وفاقی وزیر داخلہ محسن نقوی آکھیے پورے ڄق اچ تھیوݨ آلی دہشت گردی اچ بھارت ملوث اے، بھارت دہشتگرداں کوں فنڈنگ اتے ٹارگٹس ݙیندا پئے، اسلام آباد حملے دی منصوبہ بندی افغانستان اچ تھئی، دھماکے دے ماسٹر مائنڈ تے سہولت کاراں کوں پکڑ گھدے۔ اسلام اباد اچ پریس کانفرنس کریندے انہاں آکھیا جو خودکش دھماکے دے متاثرین دے غم اچ نال ہیں، دہشت گرد بزدلاں وانگوں معصوم شہریاں تے حملے کریندے پئن، انٹیلی جنس ایجنسیاں دی کارروائی نال ٻہوں سارے دہشت گرد منصوبیاں کوں ناکام بݨایا ڳئے، دھماکے دی ساری منصوبہ بندی افغانستان توں تھئی، خودکش بمبار تربیت کیتے افغانستان گیا ہئی، افغانستان توں دہشت گرداں دے ٻہوں سارے گروہ آپریٹ کریندے پئن۔ انہاں آکھیا جو داعش کوں ساری فنڈنگ اتے ٹارگٹ بھارت ݙیندا پئے، ماسٹر مائنڈ دا تعلق داعش نال اے اتے او ساݙی حراست اچ اے، کارروائی اچ ہک اہلکار شہید اتے 3 زخمی تھئن۔ سیکورٹی اداریاں دھماکے دے سارے ذمہ داراں کوں پکڑ ڳھدے، نوشہرہ اتے پشاور اچ 4 سہولت کار گرفتار کیتے ڳئن، آوݨ والے ݙینہاں اچ ٻئی تفصیل ݙیسوں، گزری رات 3 وڄے خودکش بمبار نال رابطے اچ رہوݨ آلے سارے بندے پکڑیڄ ڳن، سی ٹی ڈی خیبر پختونخوا گرفتاری اچ اہم کردار ادا کیتے، انٹیلی جنس ایجنسیاں دی کارروائی نال ٻہوں سارے دہشت گرد منصوبیاں کوں ناکام بݨایا ڳئے۔ انہاں آکھیا جو مئی دے بعد بھارت اچ دہشت گرداں دی فنڈنگ ترائے گنا ودھا ݙتی گئی اے، ساکوں ساریاں چیزاں دا پتہ اے، جیہرے دہشت گرد کوں پہلے 500 ڈالر ملدے پئے ہن ہݨ اوکوں 1500 ڈالر ملدن، ہک ݙینہہ دنیا بھارت دی دہشت گردی تے چپ دا روزہ ضرور تروڑیسی۔ انہاں آکھیا جو بی ایل اے کوں عالمی سطح تے کالعدم قرار ݙتا ڳئے، واضح ݙسیندا پیاں جو کالعدم تنظیماں کوں ساری فنڈنگ اتے ٹارگٹ بھارت ݙیندا پئے، بھارت فرنٹ تے انہاں دہشت گرد تنظیماں کوں رکھیا ہوئے۔ وفاقی وزیر داخلہ دا آکھݨ ہئی جو بھارت پچھو رہ تے آپریٹ کریندا پئے، دنیا اڄ ٻھانویں نہ ٻولے ٻھل ہک ݙینہہ ہر ملک دہشت گرداں دے سرپرست بھارت دا ناں گھنسی۔ محسن نقوی آکھیا جو بھارت جنگ نہ جِتݨ تے ہݨ اے طریقہ آزمیندا پئے، بھارت بھانویں بجٹ 10 گنا ودھا ڳھنے اساں ول وی اوکوں شکست ݙیسوں۔ انہاں آکھیا جو خیبر پختونخوا ہووے یا بلوچستان اساں ایں ویلھے حالتِ جنگ اچ ہیں، کمیونٹی دی انٹیلی جنس اہم اے، دعوے نال آہداں جو ہک دھماکا تھئے ٻھل 99 دھماکے روکیے وی ہین۔ انہاں آکھیا جو بلوچستان اچ جتنے دہشت گرد حملے تھئن، جیڑھا وی آئے بچ تے نئیں ڳیا، بی ایل اے ویڈیو ٻݨیندی اے جیڑھی بھارتی میڈیا تے چلدی اے۔ انہاں آکھیا جو دہشت گردی علاقائی خطرہ اے، دنیا کوں آواز چاوݨی چاہیدی اے، دنیا کوں ݙیکھݨاں چاہیدے جو اے جنگ کتھاہیں ٻئی ڄاہ لڳی گئی تاں کیندا نقصان تھیسی، جݙݨ انہاں دے جنازے چویسن تاں اے آکھسن جو اے بھارت کریندا پئے، اساں دہشت گردی دے خلاف جنگ لڑدے پئے ہیں اتے اپݨے پیاراں دے جنازے چیندے پئے ہیں۔ انہاں آکھیا جو دشمن دشمن اے، دشمن دی کیٹیگریز نئیں ہوندی، پاکستان دے خلاف جنگ کرݨ والے کوں کیٹیگریز اچ نا ونݙو، دنیا آواز نا چاتی تاں ݙیکھ ڳھنائے ایںدا کتنا نقصان تھیسی، دہشت گرد تنظیماں مل تے کارروائیاں کریندیاں پئن، اساں قوم دے تعاون نال دہشت گرداں دے مذموم عزائم کوں ناکام بݨیندے رہسوں۔