وزیراعظم شہباز شریف دی موجودہ سولر صارفین دے کنٹریکٹ دے تحفظ دے حوالے نال فوراً نظرِ ثانی اپیل دائر کرݨ دی ہدایت

اسلام آباد۔ 11 فروری (اے پی پی) وزیراعظم محمد شہباز شریف نیپرا ولوں سولر دے حوالے نال نویں ریگولیشنز دے اجراء دا فوری نوٹس گھندیں ہوئیں پاور ڈویژن کوں ہدایت کیتی اے جو موجودہ سولر صارفین دے کنٹریکٹ دے تحفظ دے حوالے نال فوراً نظرِ ثانی دی اپیل دائر کیتی ون٘ڄے۔ منگل کوں وزیراعظم آفس دے میڈیا ونگ توں جاری بیان دے مطابق وزیراعظم شہباز شریف دی زیرِ صدارت نیپرا ولوں نویں ریگولیشنز دے اجراء تے خصوصی اجلاس اسلام آباد اچ تھیا۔ اجلاس اچ نائب وزیراعظم تے وزیرِ خارجہ اسحاق ڈار، وفاقی وزراء احد خان چیمہ، عطاء اللہ تارڑ، علی پرویز ملک، سردار اویس احمد خان لغاری، وزیرِ مملکت بلال اظہر کیانی، مشیرِ نجکاری محمد علی تے ٻئے اعلیٰ حکام شرکت کیتی۔ وزیراعظم ہدایت کیتی جو پاور ڈویژن نیپرا کوں موجودہ سولر صارفین دے کنٹریکٹ دے تحفظ کیتے فوراً نظرِ ثانی دی اپیل دائر کرے تانجو موجودہ کنٹریکٹس دا ہر ممکن تحفظ یقینی بݨایا ون٘ڄے۔ وزیراعظم آکھیا جو 4 لکھ 66 ہزار سولر صارفین دا بوجھ 3 کروڑ 76 لکھ توں زیادہ صرف نیشنل گرڈ توں بجلی استعمال کرݨ آلے صارفین تے نہ پووے، ایں حوالے نال پاور ڈویژن جامع لائحہ عمل تشکیل ڈیوے۔