مسلح افواج دیاں وطن کیتے لازوال قربانیاں ہین، کہیں قومی ادارے کوں نشانہ بݨاوݨ مناسب کائنی، وزیرِ دفاع خواجہ محمد آصف

اسلام آباد۔ 11 فروری(اے پی پی) وزیرِ دفاع خواجہ محمد آصف قومی اسمبلی اچ اپوزیشن لیڈر دے پاکستان آرمی بارے بیاناں کوں ݙاݙھا غیر ذمہ دارانہ قرار ݙیندے آکھیے جو اینڄھے بیان ایں قومی ادارے کوں کمزور کرݨ آلی ڳالھ ہین، ڄئیں ملک کیتے ٻہوں قربانیاں ݙتین، پاکستان دی مسلح افواج وطن دی سالمیت اتے حفاظت کیتے اپݨیاں جاناں ݙیندیاں پئن، سیکورٹی فورسز ساݙی رید لائن ہین۔ قومی اسمبلی اچ ذاتی وضاحت تے انھاں آکھیا جو جمہوریت اچ سیاسی اختلافات فطری ہین، اساں پالیسیاں اتے نظریات تے اختلاف کر سڳدے ہیں ٻھل کہیں وی قومی ادارے کوں نشانہ بݨاوݨ مناسب کائنی۔ انھاں آکھیا جو پاکستان آرمی پورے وفاق اتے سارے صوبیاں دی اے، پچھلے کڄھ سالاں اچ دہشت گردی دے خلاف جنگ اچ ہزاراں افسراں اتے جواناں ڈیوٹی ݙیندے شہادت کوں ڳل لائے۔ انھاں ݙسایا جو 2021 توں فروری 2026 تئیں دہشتگردی دے خلاف جاری جنگ اچ پاکستان آرمی دے 3,141 افسراں اتے جواناں شہادت پاتی۔ وزیرِ دفاع ایں دعوے کوں سختی نال مسترد کیتے جو آرمی کہیں ہک صوبے یا علاقے دی نمائندگی کریندی اے۔ ایکوں “وفاقی فورس” قرار ݙیندے انھاں آکھیا جو پاک فوج دے جواناں دا تعلق پنجاب، سندھ، خیبر پختونخوا، بلوچستان، آزاد کشمیر، گلگت بلتستان اتے اقلیتی برادریاں سودھا پورے ملک توں اے۔ خواجہ آصف آکھیا جو ریکارڈ اچ واضح لکھیا ہووݨا چاہیدے جو پاکستان آرمی ہک قومی ادارہ اے جیندے اچ سارے وفاقی اکائیاں موجود ہن۔ انھاں سیاسی رہنماواں توں اپیل کیتی جو او اینڄھے بیاناں توں پرہیز کرن جیندے نال قومی جذبات کوں ٹھیس پڄے۔ انھاں آکھیا جو سیاستدان اپݨے کیریئر اچ کئی واری پارٹیاں وٹیندن، ٻھل جنھاں شہادت پاتی انھاں کݙاہیں اپݨے حلف دی خلاف ورزی نئیں کیتی۔