پاکستان اتے ایران سرحدی انتظام اتے دہشت گردی مکاوݨ کیتے پرعزم ہن، صدرِ مملکت آصف علی زرداری

اسلام آباد۔ 11 فروری (اے پی پی) صدرِ مملکت آصف علی زرداری آکھیے جو پاکستان اتے ایران ہمسایہ ملک ہوندے ہوئے سرحدی انتظام، دہشتگردی مکاوݨ اتے اتے اپݨی مشترکہ سرحد کوں تعاون، قانونی تجارت اتے ترقی دے زون اچ بدلݨ کیتے پرعزم ہن۔ انہاں اے ڳالھ اسلام آباد اچ ایران دے قومی ݙینہہ دے موقع تے ایرانی سفارت خانے دی تقریب نال خطاب اچ آکھی۔ تقریب اچ وفاقی وزراء، گورنر خیبر پختونخوا تے گلگت بلتستان دے علاوہ غیر ملکی سفیراں، پارلیمنٹیرینز تے صحافیاں شرکت کیتی۔ صدرِ مملکت آکھیا جو پاکستان دے عوام اتے حکومت ولوں ایرانی عوام نال انھاں دے قومی ݙینہہ دی تقریب اچ آوݨ وݙے ماݨ دی ڳالھ اے، پاکستان اتے ایران صرف ہمسائے ہی نئیں تہذیبی شراکت دار وی ہین۔ ساݙی مشترکہ سرحد صدیاں توں بقائے باہمی اتے باہمی احترام دی عکاسی کریندی اے۔ ساݙے تعلقات دیاں جڑاں تاریخ، عقیدے اتے پائیدار ثقافتی ڳانݙھے نال ٻدھیاں ہوئن، ساݙا قومی ترانہ وی اپݨی سنڄاݨ کیتے فارسی دے ڳھاٹے اثرات دا ثبوت اے۔ انہاں آکھیا جو علامہ اقبال، سچل سرمست، رومی، حافظ، سعدی اتے فردوسی ڄھیں مفکرین ساݙے کیتے رہنما ہین اتے فارسی زبان ݙوہیں معاشریاں کیتے وقار دی علامت اے۔ صدرِ مملکت آکھیا جو اج ساڈا خطہ ہک حساس موڑ تے کھڑے، جتھاں دہشت گردی تے جاری تنازعات استحکام کیتے خطرہ ہن، انھاں چیلنجز دا مقابلہ طاقت نال نئیں کیتا ونڄ سڳدا، ایران دے حوالے نال کہیں وی قسم دا عدم استحکام یا مسائل کوں فوجی طاقت نال حل کرݨ دی کوشش ٻہوں وڈے خطرات پیدا کر سڳدی اے، جیندے نال جنوبی ایشیا اتے عالمی معیشت کوں نقصان پہنچ سگدے، پاکستان یکطرفہ پابندیاں دے خلاف اے اتے سمجھدے جو پرامن مذاکرات ہی سلامتی دا بہترین رستہ ہن۔ تقریب اچ پاکستان اتے ایران دے قومی ترانے وڄائے گئے، اسلام آباد دھماکے دے شہداء کیتے ہک منٹ دی خاموشی اختیار کیتی گئی اتے صدرِ مملکت مہماناں نال مل تے کیک وی کٹیا۔