پاکستان ہر قسم دی انتہاپسندی، دہشت گردی، نفرت تے پرتشدد نظریات دے خلاف جدوجہد پوری قوت نال جاری رکھݨ کیتے پرعزم اے، وزیراعظم محمد شہباز شریف

اسلام آباد۔ 12 فروری (اے پی پی) وزیراعظم محمد شہباز شریف ہر قسم دی انتہاپسندی، دہشت گردی، نفرت تے پرتشدد نظریات دے خلاف قومی جدوجہد پوری قوت نال جاری رکھݨ دے عزم دا اعادہ کریندیں ہوئیں آکھیا جو پاکستان ݙہاکیاں توں دہشت گردی تے انتہاپسندی دے خلاف بے مثال قربانیاں ڈیندا پئے، عالمی برادری کوں پراݨے تنازعات دا منصفانہ تے پرامن حل لبھݨا پوسی۔ پی ایم آفس دے میڈیا ونگ دے مطابق وزیراعظم محمد شہباز شریف اے ڳالھیں تشدد تے مبنی انتہاپسندی دی روک تھام دے عالمی ڈینہہ (12 فروری) دے موقع تے آپݨے سنیھے اچ آکھی۔ وزیراعظم محمد شہباز شریف آکھیا جو تشدد تے مبنی انتہاپسندی دی روک تھام دے عالمی ڈینہہ تے پاکستان ایں عزم دا اعادہ کریندے جو اساں ہر قسم دی انتہاپسندی، دہشت گردی، نفرت تے عفریت تے تشدد آمیز نظریات دے خلاف آپݨی قومی جدوجہد پوری قوت نال جاری رکھسوں۔ انھاں آکھیا جو انتہاپسندی تے تشدد دے نظریات نہ صرف معاشریاں دے امن کوں نقصان ݙیندن بلکہ انسانیت، رواداری تے آپسی احترام جیہڑیاں بنیادی انسانی قدراں کوں وی کمزور کریندن۔ پاکستان پچھلے کئی ݙہاکیاں اچ دہشت گردی دے خلاف بے مثال قربانیاں ڈتن، اساڈے بہادر سکیورٹی اہلکاراں تے شہریاں دی قربانیاں اساݙے قومی عزم دی روشن مثال تے باعثِ فخر ہن۔ وزیراعظم محمد شہباز شریف آکھیا جو اسلام امن پسند دین اے جیہڑا اعتدال، رواداری، مکالمے تے انسانی جان دے احترام دا درس ڈیندے۔ اساں کوں نوجوان نسل کوں تعلیم، موقعے تے مثبت سوچ فراہم کر تے انھاں کوں انتہاپسندانہ نظریات توں محفوظ بݨاوݨا پوسی۔ عالمی منظر نامے تے بھارت دے غیر قانونی زیرِ تسلط جموں تے کشمیر تے فلسطین اچ معصوم شہریاں دے خلاف ریاستی ظلم وی انتہاپسندانہ رویے دی عکاسی اے، پاکستان عالمی برادری تے زور ݙیندے جو او انھاں تنازعات دے منصفانہ حل کیتے موثر اقدامات کرے۔ وزیراعظم آکھیا جو پاکستان عالمی برادری نال رل تے ہک منصفانہ عالمی نظام دے قیام کیتے آپݨا کردار ادا کریندا رہسی۔