سید یوسف رضا گیلانی دی قیادت اچ اعلیٰ سطح پارلیمانی وفد اقوام متحدہ دی سالانہ پارلیمانی سماعت اچ شرکت کیتے امریکا پڄ ڳئے

اسلام آباد۔12 فروری(اے پی پی) چیئرمین سینیٹ سید یوسف رضا گیلانی دی قیادت اچ اعلیٰ سطح پارلیمانی وفد اقوام متحدہ دی سالانہ پارلیمانی سماعت اچ شرکت کیتے امریکا پڄ ڳئے۔ سید یوسف رضا گیلانی پارلیمانی وفد دے نال 12 تے 13 فروری کوں نیویارک اچ تھیوݨ والی سالانہ پارلیمانی سماعت اچ پاکستان دی نمائندگی کریسن۔ اقوام متحدہ دے 80 سال پورے تھیوݨ تے تھیوݨ والے عالمی پارلیمانی اجلاس اچ پاکستان دا موثر کردار آڳونہا کتیا ویسی۔ چیئرمین سینیٹ دی اقوام متحدہ دی جنرل اسمبلی دے صدر اتے آئی پی یو (IPU) دے صدر نال اہم ملاقاتاں متوقع ہن۔ سالانہ آئی پی یو پارلیمانی سماعت اچ امن، پائیدار ترقی اتے جمہوری حکمرانی تے اہم مکالمہ تھیسی۔ سید یوسف رضا گیلانی عالمی فورم تے “پیکٹ فار دی فیوچر” تے کثیرالجہتی نظام دی مضبوطی اتے پاکستان دا موقف پیش کریسن۔ عالمی وعدیاں کوں قومی حقائق اچ ڈھالݨ تے جمہوری زوال دے چیلنجز تے پارلیمانی ذمہ داریاں تے غور تھیسی۔ پاکستان دا چھی رکنی پارلیمانی وفد عالمی پارلیمانی سفارت کاری اچ متحرک شرکت کریسن۔ اقوام متحدہ ہیڈکوارٹرز، نیویارک اچ تھیوݨ والے اجلاس اچ دنیا بھر دے پارلیمنٹرینز تے سفارتکار شریک تھیسن۔