پاکستان دا افغان طالبان حکام توں دہشت گرد تنظیماں دے خلاف ٹھوس کارروائی دے مطالبے دا اعادہ

اسلام آباد۔12 فروری(اے پی پی) پاکستان افغان طالبان دے حکام توں آپݨی سرزمین توں سرگرم دہشت گرد تنظیماں دے خلاف ٹھوس کارروائی کرݨ دے مطالبے دا اعادہ کریندے آکھیے جو او نہ تاں سفارتکاری دے دروازے بند کریسن اتے نہ ہی ݙوہیں برادر ملکاں وچال جنگ دا در کھولیسن۔ دفتر خارجہ دے ترجمان طاہر حسین اندرابی پریس بریفنگ اچ آکھیے جو جنگاں اتے جھڑپاں اچ وی سفارتکاری جاری رہندی اے، اساں سفارتکاری دے در بند نا کریسوں، آپݨے افغان بھراواں اتے ٻھیݨیں کیتے امن اتے خوشحالی چاہندے ہیں۔ اقوام متحدہ دی سلامتی کونسل دی حالیہ رپورٹ دا حوالہ ݙیندے ہوئیں ترجمان آکھیے جو اے دستاویز ٹی ٹی پی (TTP) اتے افغانستان دے حوالے نال پاکستان دے موقف دی تکڑی تائید کریندی اے جیندے اچ واضح کیتا ڳئے جو عبوری افغان حکومت دہشت گرد تنظیماں کوں ہک سازگار ماحول ݙیندی پئی اے۔ انہاں آکھیے جو رپورٹ اچ القاعدہ کوں افغانستان اچ ٻیاں مسلح دہشت گرد گروہاں کیتے ہک سہولت کار دے طور تے ݙسایا ڳئے کیتا ڳئے، تحریک طالبان پاکستان کوں ودھ آزادی اتے امداد حاصل رہی جیندے نال پاکستان اچ حملے کیتے ڳئن۔ ترجمان دے مطابق اے رپورٹ پاکستان دے ایں موقف دی تصدیق کریندی اے جو ٹی ٹی پی دی ولا سرگرمی 2021 دے بعد عبوری حکومت دے اقتدار اچ آوݨ نال منسلک اے، اے ہک اہم رپورٹ اے جیندے تے اساں اقوام متحدہ اتے بین الاقوامی برادری نال رابطہ کریندے پئے ہیں۔ ہک سوال دے جواب اچ ترجمان تصدیق کیتی جو وزیراعظم محمد شہباز شریف 19 فروری کوں “بورڈ آف پیس” دے افتتاحی اجلاس اچ شرکت کریسن جݙاں جو نائب وزیراعظم و وزیر خارجہ محمد اسحاق ڈار وی انھاں دے نال ہوسن۔ انہاں آکھیے جو اساں بورڈ آف پیس اچ نیک نیتی نال شامل تھئے ہیں، اساں ایندے اچ کلہے کائنی ٻھل اٹھ اسلامی عرب ملکاں دی مشترکہ آواز دے طور تے شامل ہیں۔ انہاں آکھیے جو اساں فلسطینی عوام دے حق، ترقی اتے خوشحالی کیتے جدوجہد جاری رکھسوں۔ اسلام آباد اچ تھیوݨ والے حالیہ دھماکے دے بعد بھارتی وزارتِ خارجہ دے بیان تے تبصرہ کریندے ہوئیں ترجمان آکھیے جو ایں بیان اچ دہشت گردی کوں جواز ݙیوݨ دا تاثر پاتا ویندے جیڑھا بھارت دے ایں دعوے دے الٹ اے جو او دہشت گردی دی مخالفت کریندے۔ انہاں آکھیے جو ایندے توں اے نتیجہ نکلدے جو بھارت دہشت گردی دی مخالفت تاں کریندے پر جݙاں دہشت گردی پاکستان دے خلاف ہووے تاں او ایندی حمایت کریندے۔ ترجمان اے وی آکھیے جو بھارت اچ مسلماناں دے خلاف “لنچنگ” دے واقعات جاری ہن جیندے اچ گزرے سال گھٹ توں گھٹ 55 مسلمان تشدد دا نشانہ بݨے جیڑھا جو ہک تشویشناک رجحان اے۔ انہاں بھارتی حکومت توں مطالبہ کیتے جو او انھاں واقعات دی تحقیقات کرے اتے عالمی برادری توں صورتحال دی نگرانی دی اپیل وی کیتی۔ ترجمان آکھیے جو پاکستان امن اتے جنگ روکݨ کیتے ایں دوران امریکی کردار کوں سراہندے۔ انہاں آکھیے جو پاکستان بھارتی رافیل طیارے مار گرائے ہن جیندے ثبوت بین الاقوامی سطح تے موجود ہن۔ ایران اتے امریکا دے ن مذاکرات دے حوالے نال ترجمان آکھیے جو پاکستان جوہری مذاکرات سودھا سارے مسئلیاں دے حل کیتے سفارتکاری دی حمایت کریندے۔ ہک سوال دے جواب اچ انہاں آکھیے جو پاکستان دا بھارت دے خلاف ٹی ٹوئنٹی میچ کھیݙݨ دا فیصلہ پاکستان ولوں کھلے دل دا مظہر اے جو کرکٹ کوں سیاست دی نذر نہ کیتا ونڄے۔ سفارتی سرگرمیاں بارے ترجمان آکھیے جو ازبکستان دے صدر شوکت مرزیایوف پاکستان دا دورہ کیتے اتے ݙوہیں ملکاں ݙو ارب ڈالر دی تجارت دا ہدف مقرر کیتے۔ ایویں ای قازقستان دے صدر قاسم جومارت توکایف دے دورے اچ ہک ارب ڈالر تجارت دا ہدف طے تھیا۔ ترجمان مزید آکھیے جو پاکستان سٹریٹجک ایکسپورٹ کنٹرول ایکٹ 2004 دے تحت نویں لسٹ جاری کیتی اے جیڑھی پاکستان دے عدم پھیلاؤ دے عزم دا ثبوت اے۔ ترجمان آکھیے جو اٹھ مسلم ملکاں نے غزہ اچ اسرائیلی جارحیت دی مذمت کیتی اے تے 1967 دی سرحداں دے مطابق آزاد فلسطینی ریاست دے قیام دی حمایت کیتی اے جیندے دارالحکومت القدس تھیسی۔ (ج، م/ 21:45)