پاکستان بنگلہ دیش دی نویں حکومت نال تجارتی، دفاعی تے ثقافتی تعاون مضبوط بݨاوݨ کیتے کم کرݨ دا منتظر اے، صدر آصف علی زرداری دی طارق رحمان کوں مبارکباد

اسلام آباد۔ 13 فروری (اے پی پی) صدرِ مملکت آصف علی زرداری بنگلہ دیش نشنلسٹ پارٹی (بی این پی) تے ایندے رہنما طارق رحمان کوں قومی انتخابات اچ زبردست اکثریت حاصل کرݨ تے اگلی حکومت بݨاوݨ دا مینڈیٹ ملݨ تے مبارکباد ݙتی اے۔ جمعہ کوں ایوانِ صدر دے پریس ونگ دے مطابق صدرِ مملکت 299 نشستاں تے انتخابات دے کامیاب انعقاد تے 127 ملین توں زیادہ رجسٹرڈ ووٹرز دی شمولیت تے بنگلہ دیش دی عوام کوں وی مبارکباد ݙتی۔ صدرِ مملکت پاکستان دی بنگلہ دیش دی خودمختاری تے جمہوری امنگاں کیتے حمایت دا اعادہ کریندیں ہوئیں آکھیا جو پاکستان نویں حکومت نال تجارتی، دفاعی، ثقافتی تبادلے تے علاقائی فورمز اچ تعاون کوں مضبوط کرݨ کیتے کم کرݨ دا منتظر اے۔ صدر آصف علی زرداری آکھیا جو بنگلہ دیش دے انتخابات جنوبی ایشیا کیتے ماضی دے مرحلیاں توں اگوں ودھݨ دا ہک موقع ہن۔ ماضی دے انھاں مرحلیاں اچ علاقائی تعاون بشمول سارک وی شامل اے جیندا قیام 1985 اچ بنگلہ دیش اچ عمل اچ آٰیا ہئی، ایندے باوجود اے تنظیم بھارت دے زیرِ اثر رہی جیہڑا اج وی ایں عظیم فورم کوں مفلوج کیتی کھڑے ۔ انھاں ایں امید دا اظہار کیتا جو ڈھاکہ دا نواں سیاسی ماحول پورے خطے اچ زیادہ متوازن، آزاد تے باہمی احترام تے مبنی رابطیاں کوں فروغ ݙیسی۔ صدرِ مملکت بنگلہ دیش دے استحکام، ترقی تے خوشحالی کیتے نیک تمناواں دا وی اظہار کیتا۔