پاکستان سارے ملکاں نال امن اتے پائیدار ترقی ودھاوݨ سانڳے رل تے کم کرݨ چاہندے، صدر آصف علی زرداری

اسلام آباد۔ 13 فروری(اے پی پی) صدرِ مملکت آصف علی زرداری آکھیے جو پاکستان سارے ملکاں نال مل تے باہمی افہام و تفہیم، امن تے پائیدار ترقی دے ودھارے کیتے رل تے کم کرݨ کوں تیار اے۔ اے ڳالھ انہاں اسلام آباد اچ نیشنل ڈیفنس یونیورسٹی اچ “قیادت اتے استحکام” بارے تھیوݨ والی چھیویں بین الاقوامی ورکشاپ دے شرکاء نال خطاب اچ آکھی۔ انھاں آکھیا جو قیادت اتے استحکام او بنیادی تھمب ہن جنھاں تے قوماں اتے ادارے کھڑے تھیندن، اڄ دنیا تیزی نال بدلدے حالات ݙیہدی پئی اے جیندے اچ جغرافیائی و سیاسی تبدیلیاں اتے ٹیکنالوجی دا ودھدا ہویا کردار شامل اے۔ صدرِ مملکت آکھیا جو ورکشاپ نال خطاب کرݨ وݙے ماݨ دی ڳالھ اے۔ انھاں شرکاء کوں کورس دی کامیابی تے مبارکباد ݙتی اتے نیشنل ڈیفنس یونیورسٹی کوں خراجِ تحسین پیش کیتا۔ صدرِ مملکت آکھیا جو سلامتی ہݨ صرف روایتی جنگاں تئیں محدود کائنی رہی، ایندے اچ سائبر سکیورٹی تے ہائبرڈ خطرے وی شامل ہن۔ انھاں آکھیا جو موسمیاتی تبدیلی اتے وسائل دی کمی سرحد پار دے مسئلے ہین جنھاں کیتے سانجھے حل دی لوڑھ اے۔ صدر آکھیا جو اے ورکشاپ صرف علمی مشق کائنی، اتھاں تھیوݨ والی ڳالھ مہاڑ کوں عملی حل اچ ڈھالیا ونڄے اتے تصادم دی بجائے تعاون دا رستہ ڳولیا ونڄے۔ “قیادت تے استحکام” دے موضوع تے ایں ورکشاپ اچ 49 ملکاں دے 69 لوک شریک تھئے ڄݙآں جو پاکستان سودھا مجموعی شرکاء دی تعداد 99 ہئی۔ صدر آصف علی زرداری سوالاں دے جواب ٹے اتے آکھیا جو پاکستان خطے دے کئی ملکاں نال قریبی تعاون کریندا پئے، ورک فورس کوں مضبوط بݨاوݨ کیتے تیار ہیں۔ صدرِ مملکت آکھیا جو پاکستان اتے دنیا کولو باہمی تعاون دے علاوہ ٻیا کوئی راہ کائنی کیوں جو سارے ملک ہک ٻئے نال جڑیے ہوئن۔ صدر آکھیا جو 18 ویں آئینی ترمیم قوم کوں پائیدار مستقبل دی ضمانت ݙیوݨ کیتے ٻݨائی گئی ہئی کیوں جو اے عوامی جذبات اتے قومی دولت دے فیصلے اچ عوام دی شراکت داری کوں ماݨ ݙیندی اے۔ انھاں آکھیا جو پاکستان پیپلز پارٹی شہید محترمہ بینظیر بھٹو دے ایں وژن تے یقین رکھدی اے جو خواتین اچ قیادت دا جذبہ پیدا کیتا ونڄے اتے انھاں کوں حقوق ݙیوائے ونڄن۔ صدر آصف علی زرداری اپݨیاں یاداں وی تازہ کیتیاں اتے آکھیا جو انھاں شہید محترمہ بینظیر بھٹو دے ساتھی دے طور تے عوام دی خدمت اتے خواتین کوں بااختیار بݨاوݨ کیتے اپݨی توانائی لائی اے۔ ایں موقع تے میجر جنرل محمد رضا شرکاء دا تعارف کرایا تے ایوانِ صدر دا دورہ کراوݨ تے صدرِ مملکت دا شکریہ ادا کیتا۔