وزیراعظم دا ملک دے 1 کروڑ 21 لکھ مستحق خانداناں کیتے رمضان پیکج دا اعلان ، فی خاندان 13 ہزار روپے دی ادائیگی کیتی ویسی، محمد شہباز شریف

اسلام آباد۔ 14 فروری (اے پی پی) وزیراعظم محمد شہباز شریف رمضان المبارک دے دوران ہک کروڑ 21 لکھ مستحق خانداناں کیتے 13 ہزار روپے فی خاندان دے حساب نال 38 ارب روپے دے رمضان پیکج دا اعلان کریندیں ہوئیں آکھیا جو ملک دے کونے کونے اچ مستحق سفید پوشاں کوں شفاف طریقے نال ڈیجیٹل بینکنگ دے ذریعے ادائیگیاں کیتی ویسن۔ او ہفتے کوں اتھاں وزیراعظم رمضان پیکج 2026 دے اجرا دی تقریب توں خطاب کریندے پئے ہن۔ ایں موقع تے  وفاقی وزیر برائے تخفیف غربت و سماجی تحفظ سید عمران احمد شاہ ،وفاقی وزیر برائے اطلاعات و نشریات  عطاء اللہ تارڑ ، وفاقی وزیر برائے پارلیمانی امور ڈاکٹر طارق فضل چوہدری ، وفاقی وزیر خزانہ سینیٹر محمد اورنگزیب ،معاون خصوصی  ہارون  اختر  خان، چیئرپرسن بی آئی ایس پی سینیٹر روبینہ خالد اتے اعلیٰ سرکاری حکام وی موجود ہن۔وزیراعظم شہباز شریف آکھیا جو رمضان دا مقدس مہینہ صرف عبادات دا کائنی بلکہ رزقِ حلال نال وسائل ونڈݨ دا مہینہ وی اے۔ انھاں آکھیا جو اساں ماضی دا پراݨا نظام ختم کر ݙتا اے جیندے اچ یوٹیلیٹی سٹورز تے مستحقین کوں قطاراں اچ کھڑا تھیوݨا پمدا ہئی، ہݨ ڈیجیٹل ادائیگیاں دا شفاف نظام اے جیندے اچ آزاد کشمیر تے گلگت بلتستان سمیت چاریں صوبیاں دے مستحق خانداناں کوں امداد ملسی۔ انھاں آکھیا جو ایں نظام دی نگرانی میں خود کیتی اے تانجو شفافیت برقرار رہے۔