چیئرمین سینیٹ سید یوسف رضا گیلانی دی امریکہ اچ آئی پی یو دی قیادت نال اہم ملاقاتاں ، پاکستان دی فعال پارلیمانی سفارت کاری دا بھرپور اظہار

نیویارک۔ 15 فروری (اے پی پی) چیئرمین سینیٹ سید یوسف رضا گیلانی نیویارک اچ انٹر پارلیمانی یونین (آئی پی یو) دی صدر ڈاکٹر ٹولیا ایکسن تے سیکرٹری جنرل مارٹن چونگونگ نال انج انج ملاقاتاں کیتن جیندے اچ پاکستان دی فعال تے باوقار پارلیمانی سفارت کاری کوں اجاگر کیتا ڳئے۔ اتوار کوں سینیٹ سیکرٹریٹ توں جاری بیان دے مطابق ملاقاتاں دے دوران چیئرمین سینیٹ سید یوسف رضا گیلانی پاکستان دے اصولی مؤقف تے جمہوری عزم کوں مدلل انداز اچ پیش کیتے۔ انھاں ایں گالھ تے زور ݙتا جو پاکستان آئی پی یو کوں دنیا دی پارلیماناں دے درمیان مکالمے تے عالمی تعاون دا ہک مؤثر پلیٹ فارم سمجھدے اتے ایں فورم تے پاکستان دا کردار ہمیشہ مثبت رہیے۔ چیئرمین سینیٹ آکھیا جو تاشقند اچ تھیوݨ آلی 150 ویں آئی پی یو اسمبلی اچ وی پاکستان امن، سلامتی تے موسمیاتی تبدیلی جیہڑے عالمی موضوعات تے واضح مؤقف پیش کیتا ہئی۔ انھاں اسلام آباد اچ تھیوݨ آلی انٹر پارلیمانی سپیکرز کانفرنس دا ذکر کریندیں ہوئیں آکھیا جو “اسلام آباد اعلامیہ” دی منظوری پاکستان دی وݙی سفارتی کامیابی اے۔ موسمیاتی تبدیلی دے حوالے نال چیئرمین سینیٹ آکھیا جو پاکستان انھاں ملکاں اچ شامل اے جیہڑے ایں توں ٻہوں متاثر تھیندے پئن۔ انھاں 2022 دے تباہ کن سیلاب دا حوالہ ڈیندیں ہوئیں عالمی برادری تے زور ݙتا جو او ترقی پذیر ملکاں دی مدد کرے۔ تریمتیں کوں بااختیار بݨاوݨ دے حوالے نال انھاں بینظیر انکم سپورٹ پروگرام کوں ہک مؤثر قدم قرار ݙتا۔ چیئرمین سینیٹ مقبوضہ جموں تے کشمیر دے لوکاں دے حقِ خودارادیت دی حمایت کیتی اتے فلسطین دے مسئلے دے منصفانہ حل تے وی زور ݙتا۔ سیکرٹری جنرل آئی پی یو نال ملاقات اچ انھاں پارلیمانی ڈیجیٹلائزیشن، مصنوعی ذہانت تے عملے دی تربیت دے شعبیاں اچ تعاون دی تجاویز وی پیش کیتی۔