نائب وزیراعظم اتے وزیرِ خارجہ سینیٹر محمد اسحاق ڈار فلسطین دی صورتحال تے اقوامِ متحدہ دی سلامتی کونسل دے اعلیٰ سطح دے بریفنگ اجلاس اچ شرکت کیتے 18 فروری کوں نیویارک دا دورہ کریسن

اسلام آباد۔ 17 فروری (اے پی پی) نائب وزیراعظم تے وزیرِ خارجہ سینیٹر محمد اسحاق ڈار فلسطین دی صورتحال تے اقوامِ متحدہ دی سلامتی کونسل دے اعلیٰ سطح دے بریفنگ اجلاس اچ شرکت کیتے 18 فروری کوں نیویارک دا دورہ کریسن۔ منگل کوں دفترِ خارجہ توں جاری بیان دے مطابق ایں اجلاس دی صدارت برطانیہ دی وزیرِ خارجہ سلامتی کونسل دی صدر دی حیثیت نال کریسن۔ بریفنگ دے دوران نائب وزیراعظم تے وزیرِ خارجہ سینیٹر محمد اسحاق ڈار فلسطین تے پاکستان دے اصولی تے مستقل موقف دا اعادہ کریسن۔ او مغربی کنارے تے آپݨا کنٹرول ودھاوݨ دے اسرائیل دے حالیہ غیر قانونی فیصلیاں دی پاکستان ولوں شدید مخالفت دا اعادہ کریسن۔ غزہ اچ مستقل جنگ بندی دی ضرورت، سلامتی کونسل دی قرارداد 2803 تے مکمل عملدرآمد، انسانی امداد اچ اضافے تے غزہ دی بحالی تے تعمیرِ نو دے جلد آغاز تے زور ݙیسن۔ نائب وزیراعظم تے وزیرِ خارجہ بین الاقوامی تے علاقائی شراکت داراں، بشمول ’’گروپ آف ایٹ‘‘ عرب و اسلامی ملکاں تے امریکہ دے نال پاکستان دے مسلسل رابطیاں کوں وی اجاگر کریسن تاکہ بین الاقوامی قانون دے مطابق ہک منصفانہ تے دیرپا امن دے قیام دی حمایت کیتی ون٘ڄ سگے۔ ایں امن دا مقصد فلسطینی عوام دے حقِ خودارادیت دا حصول تے 1967 توں پہلے دی سرحداں تے مبنی ہک آزاد، خودمختار تے مربوط فلسطینی ریاست دا قیام اے جیندے دارالحکومت القدس الشریف ہووے۔ ایں دورے دے دوران نائب وزیراعظم تے وزیرِ خارجہ سینیٹر محمد اسحاق ڈار آپݨے ہم منصباں دے نال ݙوپاسہ ملاقاتاں وی کریسن جنھاں اچ آپسی دلچسپی دے معاملیاں تے ڳالھ تھیسی۔