بی آئی ایس پی دا ماہِ رمضان توں پہلے مختلف فلیگ شپ پروگراماں دے وظائف اچ اضافے دا اعلان ، چیئرپرسن بی آئی ایس پی سینیٹر روبینہ خالد دی ’’اے پی پی‘‘ نال گالھ مہاڑ

اسلام آباد۔ 17 فروری (اے پی پی) بے نظیر انکم سپورٹ پروگرام (بی آئی ایس پی) ماہِ رمضان توں پہلے آپݨے مختلف فلیگ شپ پروگراماں دے وظائف اچ اضافے دا اعلان کر ݙتے جیندے نال ملک بھر اچ ہک کروڑ مستحق خانداناں کوں ریلیف ملسی۔ بی آئی ایس پی دی چیئرپرسن سینیٹر روبینہ خالد ’’اے پی پی‘‘ کوں خصوصی انٹرویو اچ ڈسایا جو بے نظیر کفالت پروگرام دی سہ ماہی قسط 13 ہزار 500 روپے توں ودھا تے 14 ہزار 500 روپے کر ݙتی ڳئی اے، ہک ہزار روپے اضافے دے نال نویں رقم دی ادائیگی ماہِ رمضان اچ کیتی ویسی۔ انھاں ایں اقدام کوں مستحقین کیتے ’’رمضان تحفہ‘‘ قرار ݙیندیں ہوئیں آکھیا اے جو حکومت زمینی حقیقتاں تے مہنگائی دے اثرات کوں سامݨے رکھ تے معاونت اچ اضافہ کریندی پئی اے، اساݙا مقصد کمزور طبقیاں کوں درپیش معاشی دٻاؤ کوں گھٹ کرݨ اے۔ چیئرپرسن بی آئی ایس پی آکھیا اے جو بے نظیر تعلیمی وظائف پروگرام اچ وی 500 روپے اضافے دی منظوری ݙتی گئی اے، او ٻال جنھاں دی سکول حاضری گھٹ توں گھٹ 70 فیصد تھیسی انھاں کوں مشروط نقد معاونت دی مد اچ ودھیا ہویا وظیفہ ݙتا ویسی تانجو تعلیم دا تسلسل برقرار رہ سڳے۔ ایں طرح بے نظیر نشوونما پروگرام دے تحت وی 500 روپے اضافے دی منظوری ݙتی گئی اے، اے پروگرام حاملہ تریمتیں تے کھیر پلاوݨ آلیاں ماواں کوں غذائی سپلیمنٹس تے مالی معاونت فراہم کریندے ۔ سینیٹر روبینہ خالد آکھیا جو صحت مند ماں صحت مند نسل دی ضامن ہوندی اے اتے اے پروگرام ٻالاں اچ غذائی ڳھٹکی تے نشوونما دے مسئلیاں دے تدارک اچ اہم کردار ادا کریندا پئے۔ انھاں مالی شمولیت دے حوالے نال ہک اہم سنگِ میل دا ذکر کریندیں ہوئیں ݙسایا اے جو مستحق خواتین دے ہک کروڑ بینک اکاونٹس کھولے ڳئن جیہڑی ہک تاریخی پیشرفت اے۔ انھاں آکھیا اے جو نویں ڈیجیٹل نظام دے تحت مستحق خواتین کوں بی آئی ایس پی دفتراں تے مخصوص کیمپس توں مفت سم کارڈز جاری کیتے ویسن جیہڑے ڈیجیٹل والٹس نال جڑے ہوسن ، ہر قسط دی ادائیگی تے تریمتیں کوں ایس ایم ایس دے ذریعے اطلاع ملسی تے او آپݨی ضرورت دے مطابق رقم کݙھوا سگسن۔ سینیٹر روبینہ خالد ڈسایا جو سٹیٹ بینک آف پاکستان دے تعاون نال بی آئی ایس پی آپݨے ست شراکت دار بینکاں دے درمیان ’انٹرآپریبلٹی‘ متعارف کروا ݙتی اے، ایندے توں پہلے ہر مستحق کوں ہک مخصوص بینک ایجنٹ تک محدود رکھا ویندا ہئی پر نویں نظام دے تحت او کہیں وی پارٹنر بینک دے قریبی یا قابلِ اعتماد ایجنٹ توں رقم وصول کر سگسن۔ انھاں ایں تاثر کوں مسترد کیتا اے جو سماجی تحفظ دے پروگرام انحصار کوں ودھیندے ہن۔ ایں پروگرام دے تحت تقریباً 1500 تربیت یافتہ لوک جلد فارغ التحصیل تھیسن جڈانجو 5 ہزار نویں شرکاء کوں مختلف اداریاں دے تعاون نال مقامی تے بین الاقوامی منڈیاں دے مطابق ہنر سکھائے ویندے پئن۔ سینیٹر روبینہ خالد عوام توں اپیل کیتی اے جو ماہِ رمضان کوں خدمت تے ہمدردی دا مہینہ بݨایا ون٘ڄے۔ انھاں آکھیا اے جو رمضان صرف بکھ تریہہ برداشت کرݨ دا ناں کائنی بلکہ منفی روییاں کوں چھوڑ تے ٻیاں نال بھلائی کرݨ دا درس ڈیندے ۔ انھاں زور ݙتا اے جو خوشیاں گھٹ وسیلہ لوکاں دے نال ونڈیاں ون٘ڄن تے کہیں دا حق نہ ماریا ون٘ڄے تانجو اے رمضان ساریاں کیتے آسانی تے رحمت دا سنیھا بݨ سگے۔