اقوامِ متحدہ دے 80 رکن ملکاں دی مقبوضہ مغربی کنارے تے کنٹرول ودھاوݨ دے اسرائیل دے منصوبے دی مذمت

اقوامِ متحدہ۔ 18 فروری (اے پی پی) اقوامِ متحدہ دے 80 توں ودھ رکن ملکاں مقبوضہ مغربی کنارے تے کنٹرول ودھاوݨ تے فلسطینی سرزمین دے وݙے رقبے کوں اسرائیلی “ریاست دی ملکیت” قرار ݙیوݨ دے اسرائیل دے منصوبے دی مذمت کیتی ۔ الجزیرہ دے مطابق اقوامِ متحدہ اچ فلسطینی سفیر ریاض منصور منگل کوں 85 رکن ملکاں تے کئی بین الاقوامی تنظیماں دے اتحاد ولوں گالھ مہاڑ کریندیں ہوئیں آکھیا جو اساں اسرائیل دے یکطرفہ فیصلیاں تے مغربی کنارے اچ اسرائیل دی غیر قانونی موجودگی کوں ودھاوݨ دے اقدامات دی شدید مذمت کریندے ۔ فلسطینی سفیر آکھیا جو ایں طرح دے فیصلے بین الاقوامی قانون دے تحت اسرائیل دی ذمہ داریاں دے خلاف ہن تے انھاں کوں فوری طور تے واپس گھدا ون٘ڄݨاں چہیدے۔ انھاں آکھیا جو اساں مقبوضہ بیت المقدس دے مشرقی حصے سودھے 1967 توں مقبوضہ فلسطینی سرزمین دی آبادیاتی ساخت، کردار تے حیثیت کوں تبدیل کرݨ دے سارے اقدامات کوں مسترد کریندے ۔ انھاں ٻیا آکھیا جو ایں طرح دے اقدامات بین الاقوامی قانون دی خلاف ورزی کریندن، خطے اچ امن و استحکام کیتے جاری کوششاں کوں نقصان ݙیندن، جامع منصوبے دے خلاف ہن تے تنازعے دے خاتمے کیتے امن معاہدے تئیں پڄݨ دے امکانات کوں خطرے اچ پیندن۔ سانجھے بیان تے دستخط کرݨ آلیاں اچ آسٹریلیا، کینیڈا، چین، فرانس، پاکستان، روس، جنوبی کوریا، سعودی عرب، ترکی، متحدہ عرب امارات، یورپی یونین، لیگ آف عرب سٹیٹس تے اسلامی تعاون تنظیم (OIC) شامل ہن۔ اے سانجھے بیان 1967 دے بعد مغربی کنارے دے علاقے ’’سی‘‘ اچ اراضی دی رجسٹریشن نافذ کرݨ دے اسرائیل دے فیصلے دے بعد پہلی وار جاری کیتا ڳئے۔ غیر قانونی آبادکاری دی نگرانی کرݨ والی تنظیم “پیس ناؤ” دے مطابق، ایریا سی مغربی کنارے دے تقریباً 60 فیصد علاقے تے مشتمل اے۔ بین الاقوامی عدالتِ انصاف دے مطابق، تقریباً 465,000 اسرائیلی آباد کار مقبوضہ مغربی کنارے اچ رہندن، جیہڑے تقریباً 300 وستیاں اچ پھیلے ہوئن، جیہڑا بین الاقوامی قوانین دے تحت غیر قانونی اے۔