خطے دی صورتحال پاروں توانائی دے موجودہ حالات دا سامݨا اے، لوڈشیڈنگ مُک ویسی، وفاقی وزیر توانائی

اسلام آباد۔ 16 اپریل(اے پی پی)وفاقی وزیر توانائی سردار اویس احمد خان لغاری آکھیے جو خطے دی صورتحال پاروں توانائی دے موجودہ حالات دا سامݨا اے، عوام کوں درپیش اوکھ تے معافی چاہندوں، جیویں ای گیس فراہمی بحال تھئی اتے پن بجلی (ہائیڈل) دی پیداوار ودھی تاں لوڈشیڈنگ مک ویسی۔ اسلام آباد اچ پریس کانفرنس کریندے انہاں آکھیے جو حکومت پچھلے ݙو سالاں اچ پاور سیکٹر اچ اہم اصلاحات کیتن، بجلی دیاں قیمتاں اچ کمی ڳھن آئی اتے نظام کوں بہتر طریقے نال چلایا ویندا پئے۔ اویس لغاری آکھیا جو ٻئے ملکاں دی نسبت پاکستان دی صورتحال کافی بہتر اے، منگلا اتے تربیلا ڈیم توں پاݨی دے اخراج اچ کمی پاروں تقریباً 1530 میگاواٹ بجلی دی پیداوار گھٹ تھئی اے ڄݙاں جو ایل این جی دی عدم دستیابی نال 2500 میگاواٹ شارٹ فال دا سامݨا اے۔ وفاقی وزیر توانائی آکھیا جو اپریل 2026 توں خلیج دی صورتحال پاروں تقریباً سارے ایل این جی پلانٹس کوں گیس دی سپلائی بند اے، اپریل دے پہلے 15 ݙینہاں اچ بجلی دی طلب 15 توں 20 ہزار میگاواٹ رہی، پیک آورز (مصروف اوقات) اچ لوڈشیڈنگ تے معذرت چاہندے ہیں، ݙینہہ ویلھے کوئی لوڈشیڈنگ نئیں تھیندی پئی۔ انہاں آکھیا جو پچھلے سال اپریل اچ پن بجلی نال 3200 میگاواٹ پیدا تھئی ہئی ٻھل ایں سال اے ڳھٹ تھی تے 1671 میگاواٹ رہ گئی اے۔ اویس لغاری آکھیا جو پاݨی صرف اوں ویلے ذخائر توں چھوڑیا ویندے جݙاں زرعی ضرورت ہووے، صرف بجلی کیتے پاݨی خارج نئیں کیتا ونڄ سگدا۔ انہاں آکھیا جو ایں ویلے ایل این جی اتے پن بجلی دی کمی دے فرق کوں پورا کرݨ کیتے فرنس آئل دے پلانٹس چلائے ویندے پئن ٻھل ول وی 3400 میگاواٹ شارٹ فال اے، جیںدے نال 6 توں 7 گھنٹے دی لوڈ مینجمنٹ کرݨی پوندی پئی اے۔ وفاقی وزیر آکھیا جو دیہی اتے شہری علاقیاں اچ بلا امتیاز ہکو ڄھئیں لوڈ مینجمنٹ کیتی ویندی پئی اے، کراچی الیکٹرک اتے ہیسکو دے علاقیاں اچ اضافی لوڈشیڈنگ نئیں کیتی گئی۔ صارفین توں درخواست اے جو بجلی دے استعمال اچ کفایت قرتن کیوں جو اساں ہک بین الاقوامی ہنگامی صورتحال اچ ہیں۔