ایں سال عازمینِ حج کیتے سہولتاں کوں پہلے توں ودھ بہتر ٻݨیندے پئے ہیں، وفاقی وزیر مذہبی امور

اسلام آباد۔18 اپریل (اے پی پی)وفاقی وزیر مذہبی امور سردار محمد یوسف آکھیے جو ایں سال عازمینِ حج کیتے سہولتاں کوں پہلے توں ودھ بہتر ٻݨیندے پئے ہیں، پاکستانی عازمین حج حڄاز مقدس اچ بہترین نظم و ضبط نال ہدایات تے سختی نال عمل کرن۔ میڈیا نال الیندے انہاں حجاج کرام کیتے دعا کریندے انہاں کیتے محفوظ سفر دی خواہش اتے کہیں وی قسم دی پریشانی توں پاک سفر دی امید کیتی۔ وفاقی وزیر آکھیا جو دوران حج سعودی قوانین دی مکمل پابندی کیتی ونڄے جیندی پابندی پاکستان اتے میزبان ملک دی چنڳی ساکھ کیتے ضروری اے، مقامی قوانین دے احترام نال حاجیاں دی حفاظت اتے وقار کوں یقینی ٻݨایا ویسی۔ انہاں وزارت دے حج کیمپاں اچ جاری خدمات تے اطمینان کریندے جامع تربیت، ویکسی نیشن، تحائف دی تقسیم اتے ٻیاں اہم سہولتاں دا ݙسیندے آکھیا جو انھاں اقدامات دا مقصد کہیں مشکل دے بغیر عازمینِ حج دے سفر کوں یقینی ٻݨاوݨ اے۔ انہاں آکھیا جو لاہور توں وی ہݨ مکہ مکرمہ کیتے براہِ راست پروازاں شروع تھی ڳئن۔ انہاں آعازمین کیتے سہولتاں دا ݙسایا جو عازمینِ حج کیتے اپ گریڈ شدہ سہولتاں اچ بہتر خوراک، رہائش تے نقل و حمل دی خدمات شامل ہن جیڑھیاں مقدس مقامات تے ونجݨ آلیاں کیتے زیادہ آرام دہ تے منظم سفر یقینی ٻݨیسن، میں آپ انہاں اقدامات دی نگرانی کریندا پیاں۔ انہاں متعلقہ حکام کوں ہدایت کیتی جو مکہ اتے مدینہ اچ ہسپتال اتے ڈسپنسریاں عازمینِ حج دی آمد توں پہلے مکمل طور تے تیار اتے فعال ہوݨیاں چاہیدن۔