اسرائیل ولوں نام نہاد صومالی لینڈ اچ سفارتی نمائندے دے تقرر تے پاکستان سودھا 12 ملکاں دی مذمت، مشترکہ اعلامیہ جاری

اسلام آباد۔19 اپریل(اے پی پی)ترجمان دفترِ خارجہ دے مطابق، اسرائیل ولوں نام نہاد صومالی لینڈ اچ سفارتی نمائندہ لاوݨ دے فیصلے تے پاکستان سودھا 12 ملکاں ہک مشترکہ اعلامیہ جاری کریندے ہوئیں ایں اقدام دی شدید مذمت کیتی اے‏۔ مشترکہ اعلامیے اچ پاکستان اتے ٻئے ملکاں اسرائیلی اقدام کوں صومالیہ دی خودمختاری اتے علاقائی سالمیت دی خلاف ورزی قرار ݙتے‏۔ دفترِ خارجہ دا آکھݨ ہئی جو صومالی لینڈ کوں تسلیم کرݨ دی کہیں وی کوشش کوں مسترد کر ݙتا ڳئے، اتے وزرائے خارجہ انہاں یکطرفہ اقدامات دے خلاف ہک واضح موقف اختیار کیتے‏۔ ٻئے پاسوں ترجمان آکھیا جو اعلامیے اچ صومالیہ دی وحدت اتے خودمختاری دی بھرپور حمایت دا اعادہ کیتا گئے اتے اسرائیلی قدم کوں عالمی قوانین دی کھلی خلاف ورزی قرار ݙتا گئے‏۔ دفترِ خارجہ آکھیا جو پاکستان سودھا مختلف ملکاں اقوامِ متحدہ دے چارٹر اتے افریقی یونین دے اصولاں دی خلاف ورزی دی نشاندہی کیتی اے اتے ایں اقدام کوں خطے دے امن و استحکام کیتے ہک خطرناک مثال قرار ݙتے‏۔ یاد رہوے جو مشترکہ اعلامیہ جاری کرݨ والے ملکاں اچ پاکستان توں علاوہ مصر، صومالیہ، سوڈان، لیبیا، بنگلہ دیش، الجیریا، سعودی عرب، فلسطین، ترکیہ، انڈونیشیا اتے کویت شامل ہن‏۔