صدرِ مملکت آصف علی زرداری دا یومِ اقبال دے موقع تے پیغام

اسلام آباد۔ 21 اپریل (اے پی پی) صدرِ مملکت آصف علی زرداری آکھیے جو شاعرِ مشرق، عظیم مسلم مفکر تے ایں بصیرت افروز شخصیت علامہ محمد اقبال تصورِ پاکستان کوں فکری جہت عطا کیتی، او نہ صرف ہک عظیم شاعر ہن بلکہ ہک ایجھی فکری، اخلاقی تے روحانی قوت ہن جنھاں مسلم امہ کوں خود آگاہی، فکر دی آزادی، خودداری تے جہدِ مسلسل دا رستہ ݙکھایا۔ صدرِ مملکت آصف علی زرداری یومِ اقبال (21 اپریل 2026) دے موقع تے اپݨے پیغام اچ آکھیا جو اڄ حکیم الامت، شاعرِ مشرق، عظیم مسلم مفکر علامہ محمد اقبال کوں خراجِ عقیدت پیش کریندوں جنھاں تصورِ پاکستان کوں فکری جہت عطا کیتی اے۔ زوال تے بے یقینی دے دور اچ انھاں ہک قوم دے اعتماد کوں ول جلا بخشی تے عملِ پیہم تے انھاں دے یقین کوں بحال کیتے۔ ایوانِ صدر توں جاری بیان موجب صدرِ مملکت آکھیا جو علامہ اقبال دا کلام ایشیا دے عروج تے انھاں معاشریں دی بیداری دی وی ڳالھ کریندے جیڑھے طویل عرصے تئیں ٻاہرلے تسلط دے زیرِ اثر رہین۔انھاں دے پیغام دا مرکز معاشی تے سماجی زندگی اچ عدل و انصاف دی سوچ ہئی ۔ انھاں انھاں نظاماں تے سوال چاتا جنھاں اچ محنت کشاں کوں انھاں دے واجبی حق توں محروم رکھیا ویندے ۔ صدرِ مملکت آکھیا جو علامہ اقبال فرمیندے ہن “آدمیت احترامِ آدمی، باخبر شو از مقامِ آدمی” (انسانیت انسان دے احترام دا ناں اے، انسان دے اصل مقام و مرتبے کوں سنڄاݨ)۔ ہک مستحکم، خود مختار تے ترقی پسند پاکستان دی تعمیر کیتے اے نقطہٴ نظر ناگزیر اے۔ اڄ دے ݙینھ اساں اقبال دے افکار کوں اپݨی قومی زندگی تے عوامی طرزِ عمل اچ شامل کرݨ دی اہمیت دا اعادہ کریندوں