وزیراعظم محمد شہباز شریف دا یومِ اقبال دے موقع تے پیغام

اسلام آباد۔ 21 اپریل (اے پی پی) وزیراعظم محمد شہباز شریف مفکرِ اسلام، شاعرِ مشرق تے مصورِ پاکستان علامہ محمد اقبال رحمۃ اللہ علیہ کوں خراجِ عقیدت پیش کریندے ہوئیں آکھیے جو انھاں دے افکار ہک محکوم قوم کوں بیداری، خود اعتمادی تے جدوجہدِ مسلسل دا شعور عطا کیتا، اڄ دے قومی تے عالمی حالات اچ انھاں دا پیغام ساݙے کیتے غیر معمولی اہمیت رکھیندے۔یومِ اقبال تے اپݨے پیغام اچ وزیراعظم آکھیا جو او پوری قوم دی طرفوں علامہ محمد اقبال رحمۃ اللہ علیہ کوں دلی خراجِ عقیدت پیش کریندن۔ وزیراعظم دفتردے میڈیا ونگ توں جاری بیان موجب وزیراعظم آکھیا جو بلاشبہ علامہ اقبال مسلمانانِ برصغیر دے محسن تے عظیم فکری رہنما ہن، علامہ اقبال خودی، عمل، ایمان تے فکری آزادی دا پیغام ݙتے۔ انھاں آکھیا جو فکری انتشار، انتہاپسندی تے معاشرتی عدم برداشت ایں ڳالھ دا تقاضا کریندن جو اساں اپݨی انفرادی تے اجتماعی زندگی کوں علامہ اقبال دی فکری تربیت دی روشنی اچ بݨاؤں، علامہ اقبال محبت، اخوت تے بیداریِ ملت کوں مقصدِ حیات قرار ݙتا۔وزیراعظم آکھیا جو علامہ اقبال دے نظریات دی روشنی اچ پرامن، اتحاد، علم، کردار تے انصاف دی مضبوط بنیاداں تے قائم پاکستان ہی ساݙا مستقبل اے۔ انھاں آکھیا جو حکومتِ پاکستان دہشت گردی، انتہاپسندی تے فرقہ واریت دے مکمل خاتمے کیتے پرعزم اے۔ وزیراعظم یاد ݙوایا جو علامہ اقبال دی نینگراں دی تربیت تے خصوصی توجہ ہئی، انھاں نینگراں کوں ملت دا سرمایہ تے مستقبل دا معمار قرار ݙتا ۔ انھاں آکھیا جو حکومت ایں ڳالھ تے یقین رکھدی اے جو تعلیم کوں فکری، اخلاقی تے قومی بنیاداں تے استوار کیتے بغیر قومی ترقی دا خواب پورا کائنی تھی سڳدا۔ وزیراعظم آکھیا جو پاکستان دے نینگراں جے فکرِ اقبال توں رہنمائی حاصل کرن تاں او ملک کوں ترقی، استحکام تے وقار دی نویں منزلاں تائیں پڄا سڳدن