وزیراعظم شہباز شریف دی الیکٹرک وہیکلز دے ودھار کیتے اقدامات تکھے کرݨ دی ہدایت

اسلام آباد۔ 22 اپریل (اے پی پی) وزیراعظم محمد شہباز شریف الیکٹرک وہیکلز دے ودھارے کیتے اقدامات تکھے کرݨ دی ہدایت کیتی اے۔ وزیراعظم دفتردے میڈیا ونگ توں جاری بیان موجب وزیراعظم محمد شہباز شریف دی زیرِ صدارت ملک اچ بجلی نال چلݨ آلی گاݙیاں دے ودھارے تے جائزہ اجلاس تھیا ۔ اجلاس اچ وفاقی وزراء ڈاکٹر مصدق ملک، احد خان چیمہ، محمد اورنگزیب، عطاء اللہ تارڑ، اویس خان لغاری، احسن اقبال، وزیرِمملکت بلال اظہر کیانی، وزیراعظم دے معاونِ خصوصی ہارون اختر، چیئرمین وزیراعظم یوتھ پروگرام رانا مشہود احمد خاں، گورنر اسٹیٹ بینک جمیل احمد تے متعلقہ اعلیٰ حکام شرکت کیتی اے۔وزیراعظم اجلاس توں خطاب کریندے ہدایت کیتی جو الیکٹرک وہیکلز (ای وی) دے ودھارے کیتے تکھے اقدامات کیتے ونڄن۔ موجودہ علاقائی صورتحال تے مستقبل دی ضرورتاں پاروں الیکٹرک گاݙیاں دے ودھارے نال نہ صرف تیل (ایندھن) دے درآمدی ٻوجھ گھٹ تھیسی ، بلکہ اے ماحولیاتی تحفظ تے انرجی سکیورٹی کیتے وی ٻہوں اہم اے۔ انھاں قومی ای-وی پالیسی دے تحت گھٹ آمدݨ آلے لوکاں کیتے الیکٹرک موٹر سائیکلاں تے ݙتی ونڄݨ آلی سبسڈی اچ شفافیت یقینی بݨاوݨ تے ایں اسکیم دے نفاذ اچ مزید تیزی گھن آوݨ دی وی ہدایت کیتی اے۔اجلاس کوں بریفنگ ݙتی ڳئی جو ملک اچ الیکٹرک موٹر سائیکل تے رکشہ بݨاوݨ کیتے 72 جݙاں جو الیکٹرک گاݙیاں کیتے 4 مینوفیکچرنگ سرٹیفکیٹ جاری تھی چکن۔ ایندے علاوہ ای-وی چارجنگ اسٹیشنز دے قیام کیتے ہݨ تائیں 123 درخواستاں ملئن۔ بریفنگ موجب ایجھی منصوبہ بندی کیتی ویندی پئی اے جو آوݨ آلے 5 سالاں اچ ملک اچ 30 فیصد گاݙیاں بجلی نال چلن جیندے نال اندازاً 4.5 بلین ڈالر تئیں فیول دی بچت تھیسی۔ بریفنگ موجب گریڈ 16 تئیں دے سرکاری ملازماں کوں سوکھیاں قسطاں تے الیکٹرک موٹرسائیکل ݙتے ویسن۔