چین دے تعاون نال خلائی تحقیق دا سفرݙوہیں ملکاں دے برادرانہ تعلقات اچ نویں جہتاں دا ودھارا کریسی، وزیراعظم محمد شہباز شریف دی خلائی مشن تے ونڄݨ آلے پاکستانی خلا بازاں خرم داؤد تے محمد ذیشان علی نال ڳالھ مہاڑ

اسلام آباد۔ 23 اپریل(اے پی پی) وزیراعظم محمد شہباز شریف پاکستان دے خلائی مشن کوں پاکستان کیتے ہک اہم سنگِ میل تے پوری قوم کیتے قابلِ فخر قرار ݙیندے آکھیے جو چین دے تعاون نال خلائی تحقیق دا سفر ݙوہیں ملکاں دے برادرانہ تعلقات اچ نویں جہتاں دا ودھارا کریسی۔ وزیراعظم دفتر دے میڈیا ونگ توں جاری بیان موجب اے ڳالھ انہاں خلائی مشن تے ونڄݨ آلے پاکستانی خلا بازاں خرم داؤد تے محمد ذیشان علی کوں آکھی جنہاں وزیراعظم نال ملاقات کیتی اے۔ملاقات اچ نائب وزیراعظم تے وزیرِخارجہ اسحاق ڈار، وفاقی وزیر احسن اقبال، وفاقی وزیر اطلاعات عطاء اللہ تارڑ، معاونِ خصوصی سید طارق فاطمی، سیکریٹری خارجہ آمنہ بلوچ، چیئرمین سپارکو محمد یوسف خان، پاکستان اچ چین دے سفیر جیانگ زائیڈونگ تے سپارکو دے خلاباز اتاشی حسنین افتخار وی موجود ہن۔ وزیراعظم خلا بازاں نال ڳالھ کریندے آکھیے تہاݙا خلائی مشن تے تحقیق کیتے ونڄݨ پاکستان کیتے ہک اہم سنگِ میل تے میں سودھے پوری قوم کیتے قابلِ فخر ڳالھ اے۔ پراعتماد ہاں جو تساں پاکستان دی تاریخ اچ ہک نواں باب لکھݨ ویندے پئے او۔ وزیراعظم چین دے سفیر نال ڳالھ کریندے آکھیے خلائی تحقیق اچ پاکستان تے چین دے تعاون نال ݙوہیں ملکاں دی دوستی آسمان دی اُچائی  تے پُڄدی ہوئی ستاریں تے کمند پاوݨ کیتے تیار اے۔ چین دے سفیر وزیراعظم دی ڳالھ دا خیر مقدم کیتا تے ݙوہیں ملکاں دے خلائی تحقیق اچ تعاون کوں چنڳاں قرار ݙتے۔ خلا بازاں آکھیا جو پاکستان کیتے خلا اچ تحقیق دے فرائض سرانجام ݙیوݨ عزت دی ڳالھ تے ہک وکھرا اعزاز اے۔