الیکشن کمیشن پنجاب اچ یونین کونسلز دی حلقہ بندی دا عمل شروع کر ݙتے، ترجمان

لاہور۔ 23 اپریل (اے پی پی) الیکشن کمیشن پاکستان آئینِ اسلامی جمہوریہ پاکستان دے آرٹیکل 222(b)، الیکشنز ایکٹ 2017، پنجاب لوکل گورنمنٹ ایکٹ 2025 تے متعلقہ قواعد دے تحت پنجاب اچ یونین کونسلز دی حلقہ بندی دا عمل شیڈول موجب شروع کر ݙتے۔ترجمان موجب الیکشن کمیشن ولوں حلقہ بندی کمیٹیاں تے متعلقہ حکام دی تربیت کیتے وی خصوصی اقدامات کیتے ڳئن۔ ایں سلسلے اچ باقاعدہ ٹریننگ سیشن منعقد کیتے ڳئن جنھاں دا مقصد افسراں کوں قانونی تقاضیں، طریقہ کار تے تکنیکی پہلوواں توں مکمل طور تے آگاہ کرݨ اے تاں جو حلقہ بندی دا عمل ہکو جیہا، شفاف تے موثر انداز اچ مکمل کیتا ونڄ سڳے۔حلقہ بندی کمیٹیاں ولوں شیڈول موجب ابتدائی حلقہ بندیاں دی تیاری دا آغاز کر ݙتا ڳئے جیڑھا جو 21 مئی 2026 تئیں جاری رہسی، جݙاں جو ابتدائی فہرست 25 مئی 2026 کوں شائع کیتی ویسی۔ عوام کوں اپݨے اعتراضات جمع کراوݨ کیتے 26 مئی توں 23 جون (عید دیاں چھٹیاں دے علاوہ) دا ویلھاݙتا ڳئے۔ انھاں اعتراضات تے فیصلے 22 جولائی 2026 تئیں (عاشورہ دیاں چھٹیاں دے علاوہ) مکمل کیتے ویسن ۔ فیصلیں دی ترسیل 4 اگست 2026 تئیں جݙاں جو حتمی حلقہ بندیاں دی فہرست 10 اگست 2026 کوں جاری کیتی ویسی۔ایندے علاوہ، الیکشن کمیشن پنجاب اچ جاری یونین کونسلز دی حلقہ بندی دے عمل دے پیشِ نظر پورے صوبے اچ موجود انتظامی یونٹس دی حدود اچ کہیں وی قسم دی تبدیلی تے فوری طور تے پابندی لا ݙتی اے تاں جو حد بندی دے عمل کوں شفاف، منظم تے بغیر کہیں رکاوٹ دے جاری رکھیا ونڄ سڳے ۔ الیکشن کمیشن ہدایت کیتی اے جو سارے متعلقہ ادارے مقررہ ٹائم لائنز تے سختی نال عمل درآمد یقینی بݨاون، حلقہ بندی دے عمل اچ شفافیت، غیر جانبداری تے قانون دی مکمل پاسداری کوں ہر حال اچ یقینی بݨایا ونڄے۔