این ڈی ایم اے دا ممکنہ موسمی خطرے دے حوالے نال الرٹ جاری

اسلام آباد۔ 23 اپریل (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) دے نیشنل ایمرجنسیز آپریشن سینٹر (این ای او سی) ممکنہ موسمی خطرات دے حوالے نال الرٹ جاری کرݙتے۔ این ڈی ایم اے دے میڈیا ونگ توں جاری بیان موجب موجودہ موسمی صورتحال این ای او سی ولوں 3 توں 4 مہینے پہلے جاری کیتے ڳئے متوقع موسمی جائزے دے عین موجب اے۔این ڈی ایم اے مختلف علاقیں کیتے 5 مئی تئیں زور دی گرمی (ہیٹ ویو) دا الرٹ جاری کیتے ۔ سندھ، جنوبی پنجاب تے بلوچستان دے کجھ علاقیں اچ زور دی گرمی دی لہر متوقع اے۔ کراچی، حیدرآباد، سکھر،لاڑکانہ، جیکب آباد، بہاولپور، رحیم یارخان، ملتان تے تربت دے علاقے زور دی گرمی دی وکیڑ اچ رہسن ۔ وسطی پنجاب تے خیبرپختونخوا دے کجھ علاقیں اچ وی درجہ حرارت ودھݨ دا امکان اے 24توں 29 اپریل تئیں دی ممکنہ موسمی صورتحال دا جائزہ وی جاری کیتا ڳئے۔ 24، 25 تے 29 اپریل کوں پنجاب دے اتلے تے وسطی ضلعیں اچ اندھاری تے کھمݨ نال مینھ وسݨ دا امکان اے۔ مری، اسلام آباد، راولپنڈی، اٹک، چکوال، جہلم، میانوالی، سرگودھا، گجرات، گوجرانوالہ، فیصل آباد، لاہور، ڈی جی خان تے ملتان اچ مینھ متوقع اے۔ جنوبی پنجاب دے زیادہ تر علاقیں اچ موسم گرم تے رُکھارہݨ دا امکان اے۔بلوچستان دے شمالی ضلعیں کوئٹہ، زیارت، قلات تے خضدار اچ 24، 25 تے 27 توں 29 اپریل تئیں تکھی ہوا نال مینھ وسݨ دا امکان اے ۔ سندھ اچ موسم گرم تے رُکھارہسی اتے درجہ حرارت اچ مسلسل ودھارا تھیندا رہسی۔ حیدرآباد، بدین تے مٹھی اچ 24 اپریل کوں ہلکا مینھ تے زور دی ہوا گھلݨ دا امکان اے۔ خیبرپختونخوا دے مختلف ضلعیں تے گلگت بلتستان و آزاد کشمیر اچ وی وقفے وقفے نال مینھ دی توقع اے۔زور دی گرمی پاروں لُکھ لڳݨ، پاݨی دی کمی تے صحت دے ٻئے مسئلیں اچ ودھارے دا ݙر اے۔ این ڈی ایم اے آکھیے جو عوام شدید دھپ دے اوقات اچ بلا ضرورت ٻاہر نہ نکلن، زیادہ پاݨی پیون تے احتیاطی تدابیر اختیار کرن ۔ این ڈی ایم اے متعلقہ اداریں کوں ہیٹ ویو پلان فعال کرݨ، کولنگ سینٹرز بݨاوݨ تے ہسپتالاں کوں الرٹ رہݨ دی ہدایت جاری کر ݙتی اے ۔ عوام این ڈی ایم اے دی آفیشل ایپ توں وقتی معلومات تے رہنمائی گھن سڳدن۔