کتاب دوستی تے ثقافتی ہم آہنگی دے ودھارے اچ چین – پاکستان تعلقات دی 75 سالہ شاندار داستان

اسلام آباد۔ 23 اپریل (اے پی پی) عالمی یومِ کتاب دے موقع تے چائنا میڈیا گروپ تے ادارہ فروغِ قومی زبان دے سانجھے اشتراک نال ہک پروقار تے بامقصد تقریب منعقد کیتی ڳئی اے۔ ایں موقع تے پاک چین سفارتی تعلقات دی 75 ویں سالڳنڈھ دی مناسبت نال ثقافتی ہم آہنگی، علمی تبادلیں تے کتاب دوستی دے ودھارے تے خصوصی توجہ ݙتی ڳئی اے۔تقریب اچ لکھاریاں، محققین، اساتذہ، تھنک ٹینک دے نمائندیں تے سیاسی و سماجی شخصیات شرکت کیتی اے، جیندے نال ایں علمی نشست دی اہمیت ٻئی وی ودھ ڳئی اے۔ ایں موقع تے صدرِ مجلس، پارلیمانی سیکرٹری قومی ورثہ و ثقافت ڈویژن فرح ناز اکبر اپݨے خطاب اچ آکھیا جو کتاب انسان دی بہترین رہنما تے فکری تربیت دا موثر ذریعہ اے۔ انھاں ایں ڳالھ تے زور ݙتا جو پاک چین سدا بہار دوستی کوں کتاباں تے علمی سرگرمیاں دے ذریعے نویں نسل تائیں موثر انداز اچ پڄایا ونڃ سڳدے ، تاں جو آوݨ آلی نسلاں ایں تاریخی رشتے دی اہمیت کوں بہتر طریقے نال سمجھ سڳن۔تقریب دے مہمانِ خصوصی سینیٹر مشاہد حسین سید اپݨے خطاب اچ پاک چین تعلقات دی ست ݙہاکیں تے مشتمل کامیاب داستان کوں ٻہوں سوہݨے انداز اچ پیش کیتا۔ انھاں نوجواناں کوں ایں تاریخی دوستی توں سبق سکھݨ تے ایکوں مزید تکڑا بݨاوݨ اچ اپݨا کردار ادا کرݨ دی تلقین کیتی اے۔

ڈائریکٹر جنرل ادارہ فروغِ قومی زبان پروفیسر ڈاکٹر محمد سلیم مظہر ادبی و ثقافتی رابطیں دے ودھارے کوں پاک چین دوستی کوں ٻیا گہرا کرݨ دا اہم ذریعہ قرار ݙتے۔صدر نشین اکادمی ادبیات پاکستان ڈاکٹر نجیبہ عارف آکھیا جو پاک چین تعلقات ہر شعبے اچ مثالی حیثیت رکھیندے ۔ ممتاز ماہرِ معاشیات بلال جنجوعہ آکھیا جو پاک چین تعاون اچ ٻیا وسعت دی گنجائش موجود اے۔ ماہرِ تعلیم ڈاکٹر حسان داؤد بٹ چینی صدر شی جن پنگ دے عالمی وژن دا حوالہ ݙیندے ثقافتی ہم آہنگی دی اہمیت کوں اجاگر کیتا ۔ انچارج چائنا اسٹڈی سنٹر سعدیہ حیدر آکھیا جو تعلیمی میدان اچ پاک چین تعاون ٻہوں حوصلہ افزاء اے۔

معروف صحافی ربیکا عبدل اپݨے تجربیں دا ذکر کریندے آکھیا جو چین اچ انھاں دا قیام ترقی، نظم و ضبط تے قومی وابستگی دا ہک منفرد تجربہ رہیے۔تقریب دے چھیکڑ اچ مقررین مختلف معلوماتی کتاباں دا حوالہ ݙیندے چین دی ترقی تے قیادت دی دور اندیشی کوں اجاگر کیتا۔ ایں علمی نشست نہ صرف کتاب دوستی دے ودھارےاچ اہم کردار ادا کیتے بلکہ چین تے پاکستان وچال فکری، ثقافتی تے تعلیمی رابطیں کوں مزید تکڑا بݨاوݨ دے نویں رستے وی روشن کیتن۔(ڈاکٹرسعدیہ کمال)