آئی بی سی سی دے زیرِ اہتمام آل پاکستان انٹر بورڈز ہاکی چیمپئن شپ 2025-26 دا کامیاب انعقاد، 12 تعلیمی بورڈز دی شرکت

اسلام آباد۔ 24 اپریل (اے پی پی) انٹر بورڈز کوآرڈینیشن کمیشن (آئی بی سی سی) اپݨی ذیلی کمیٹی انٹر بورڈ سپورٹس کمیٹی (IBSC) دے ذریعے آل پاکستان انٹر بورڈز ہاکی چیمپئن شپ 2025-26 دا کامیاب انعقاد کیتے، جیندی میزبانی لاہور بورڈ 21 توں 23 اپریل 2026 تائیں کیتی اے۔ چیمپئن شپ اچ ملک دے 12 تعلیمی بورڈز بھرپور شرکت کیتی اے، جنھاں اچ لاہور، گوجرانوالہ، سرگودھا، فیصل آباد، ساہیوال، راولپنڈی، بہاولپور، ملتان، پنجاب بورڈ آف ٹیکنیکل ایجوکیشن، بنوں، مردان تے پشاور شامل ہن، جیندے نال قومی سطح تے کھیݙاں دے ودھارے تے یکجہتی دا مظاہرہ تھئے۔مقابلیں دے چھیکڑ اچ لاہور بورڈ پہلی، گوجرانوالہ ݙوجھی جݙاں جو پشاور تریجھی پوزیشن حاصل کیتی اے۔ اختتامی تقریب دے مہمانِ خصوصی ایگزیکٹو ڈائریکٹر آئی بی سی سی ڈاکٹر غلام علی ملاح ہن، جنھاں دے نال اولمپین شہباز سینئر، پرویز سندیلا، خواجہ جنید، فیصل فرید، رضوان نذیر تے مسعود الرحمان سودھے ٻئی معزز شخصیات موجود ہن۔تقریب توں خطاب اچ ڈاکٹر غلام علی ملاح آکھیا جو آئی بی سی سی نہ صرف تعلیمی ہم آہنگی دا قومی ادارہ اے بلکہ طلبہ دی ہمہ جہت نشوونما کیتے ہم نصابی سرگرمیاں دے ودھارے کوں وی اپݨی بنیادی ذمہ واری سمجھدے اے۔ انھاں آکھیا جو آئی بی سی سی، انٹر بورڈ سپورٹس کمیٹی دے ذریعے ہر سال 30 توں ودھ قومی و بین الاقوامی سطح دے سپورٹس مقابلے دا انعقاد کریندے۔ جنھاں اچ چھوہرتے چھوہریں  کھݙاری برابر حصہ گھندن۔انھاں آکھیا جو قومی کھیݙ ہاکی دا ودھارا آئی بی سی سی دی ترجیحات اچ ساریں توں اُتے ہے، خاص طور تے پاکستان ہاکی فیڈریشن اچ انھاں دی شمولیت دے بعد ایں سلسلے اچ کوشِشاں ٻیاں تکھیاں کر ݙتیاں ڳئن۔ انھاں آکھیا جو تعلیمی اداریں اچ سپورٹس کلچر کوں ودھاراݙے تے اساں طلبہ اچ نظم و ضبط، ٹیم ورک، قیادت تے جسمانی و ذہنی صحت کوں بہتر بݨا سڳدوں۔ ڈاکٹر ملاح لاہور بورڈ دی طرفوں شاندار انتظامات تے پیشہ ورانہ انداز اچ مقابلے دے انعقاد دی تعریف کیتی۔