ایشیا تے بحرالکاہل کیتے فوڈ اینڈ ایگریکلچر آرگنائزیشن دی 38 ویں علاقائی کانفرنس، پاکستان دا زرعی و غذائی نظام کوں بہتر بݨاوݨ دے منصوبے دا اعلان

اسلام آباد۔ 25 اپریل (اے پی پی) ایشیا تے بحرالکاہل کیتے فوڈ اینڈ ایگریکلچر آرگنائزیشن (ایف اے او) دی 38 ویں علاقائی کانفرنس اچ پاکستان زرعی و غذائی نظام (ایگری فوڈ سسٹمز) کوں بہتر بݨاوݨ دے منصوبے دا اعلان کیتے جیند اچ خوراک ݙیوݨ، سرمایہ کاری تے سانجھے تعاون تے توجہ ݙتی ڳئی اے۔ وفاقی وزیر قومی غذائی تحفظ و تحقیق رانا تنویر حسین 38 ویں وزارتی اجلاس دے دوران پاکستان دا موقف پیش کریندے قومی تے عالمی سطح تے غذائی چیلنجز نال نبٹݨ دے اقدامات کوں اجاگر کیتے۔ اتھاں جاری پریس ریلیز موجب کانفرنس دا افتتاح برونائی دارالسلام دے شہزادہ حاجی المحدثی باللہ کیتے۔ ایں موقع تے پاکستانی وزیر انھاں نال ملاقات کیتی اتے پاکستان دی قیادت تے عوام دی طرفوں سلطان حاجی حسنال بولکیہ کیتے نیک خواہشات دا اظہار کیتے۔کانفرنس دے موقع تے وزیر برونائی دے وزیر برائے بنیادی وسائل و سیاحت عبدالمناف متوسین نال وی ملاقات کیتی اے۔ ایں ملاقات اچ ماہی گیری، آبی زراعت، زرعی ٹیکنالوجی تے لائیوسٹاک دے شعبیں اچ تعاون تے ڳالھ مہاڑ کیتی ڳئی ۔ ݙوہیں ملکاں رابطیں کوں تکڑا بݨاوݨ کیتے مشترکہ ورکنگ گروپ دے قیام تے وی غور کیتے ۔ اپݨے خطاب اچ وفاقی وزیر عالمی غذائی مسائل دے حل اچ ایف اے او دے کردار دا حوالہ ݙتے اتے ”چار بہتر“ (Four Betters) فریم ورک دا ذکر کیتے جیندے اچ پیداوار، غذائیت، ماحولیات تے معیارِ زندگی شامل اے ۔ انھاں موجب اے فریم ورک ملکاں کوں اپݨے زرعی و غذائی نظام بہتر بݨاوݨ کیتے رہنمائی ݙیندے ۔انھاں آکھیا جو موسمیاتی تبدیلی، معاشی حالات، توانائی ݙیوݨ اچ مسائل تے علاقائی جھیڑیں پاروں غذائی نظام دٻاؤ دا شکار اے، جیندے نال لاڳت اچ ودھارا، منڈیاں تے اثرات تے خوراک تائیں رسائی محدود تھیندی پئی اے۔ انھاں چیلنجز نال نبٹݨ کیتے تکھی رفتار اقدامات دی لوڑھ اے۔پاکستان دے حوالے نال وفاقی وزیر آکھیا جو زراعت ملکی معیشت، روزگار تے خوراک ݙیوݨ دا اہم شعبہ اے۔ انھاں ایف اے او دے تعاون نال کیتے ونڄݨ آلے اقدامات دا ذکر کیتے جنھاں اچ پاݨی دے بہتر استعمال، فصلاں اچ تنوع تے موسمیاتی بنیاداں تے کاشتکاری شامل ہن۔ انھاں ݙسایا جو ایں شعبے اچ ڈیجیٹل ٹولز، ڈیٹا سسٹمز تے پریسیژن فارمنگ کوں وی ودھارا ݙتا ویندا پئے تاں جو پیداوار اچ ودھارا تے وسائل دا موثر استعمال ممکن بݨایا ونڄ سڳے ۔ منصوبے اچ چھوٹے کاشتکاراں، تریمتاں  تے نوجواناں دی معاونت وی شامل اے۔ وفاقی وزیر انھاں اصلاحات کیتے سرمایہ کاری دی لوڑھ تے زور ݙتے اتے آکھیے جو پاکستان ایف اے او دے نال رل تے ڈیٹا تے مبنی مربوط حکمتِ عملی دی طرف ویندا پئے تاں جو سرکاری تے نجی سرمایہ کاری کوں متوجہ کیتا ونڄ سڳے ۔ پاکستان ایف اے او تے ٻئے شراکت داراں نال رل تے بیماریاں دی نگرانی، ٹیسٹنگ سسٹمز تے ادارہ جاتی ہم آہنگی کوں بہتر بݨاوݨ تے کم کریندا پئے ۔ مال ڈھور دیاں بیماریاں خاص طور تے منہ کھر دی بیماری تے قابو پاوݨ کیتے پروگرام جاری اے جݙاں جو جانوراں دی سُنڄاݨ تے ٹریکنگ دے نظام کوں وی وسعت ݙتی ویندی پئی اے۔ چھیکڑ اچ انھاں آکھیا جو زرعی و غذائی نظام اچ اصلاحات ہݨ ہک وقتی  لوڑھ بݨ چکن ، تے پاکستان ایف اے او تے ٻئے ملکاں نال شراکت داری دے ذریعے خوراک ݙیوݨ کوں بہتر بݨاوݨ کیتے پرعزم اے۔