سپریم کورٹ اسٹریٹجک شراکت داری دے ذریعے ترکیہ دے نال عدالتی رابطیں کوں ٻیا تکڑا بݨائے

اسلام آباد۔ 25 اپریل (اے پی پی) سپریم کورٹ آف پاکستان، پاکستان دی عدلیہ کوں جدید ٹیکنالوجی تے مبنی تے عالمی سطح تے مربوط بݨاوݨ دے وݙے وژن دے تحت ترکیہ دے نال اپݨے تعلقات کوں تکڑا بݨیندی پئی اے۔ اے شراکت داری ہݨ ہک بامقصد فریم ورک اچ ڈھل چکی اے جیند اچ ادارہ جاتی ترقی، جدت تے عدالتی نظام دے سارے درجات اچ صلاحیت ودھاوݨ تے توجہ ݙتی ویندی پئی اے۔ اپریل 2026 اچ ترکیہ دی آئینی عدالت دے نال مفاہمتی یادداشت (ایم او یو) تے دستخط ایں تعاون کوں باضابطہ شکل ݙیوݨ دی ہک اہم پیش رفت اے جیڑھی جو عدالتی تبادلیں، ٹیکنالوجی دے انضمام تے مشترکہ تربیتی اقدامات کیتے ہک منظم پلیٹ فارم ݙیندی اے۔ اے رابطے اعلیٰ سطح تے مسلسل عدالتی تعلق دا نتیجہ اے۔اپریل 2025 اچ ترکی دی آئینی عدالت دی 63 ویں سالڳنڈھ دے موقع تے ہک اعلیٰ سطحی پاکستانی عدالتی وفد دی شرکت ادارہ جاتی تعاون دی بنیاد رکھی اے۔ ایندے بعد اپریل 2026 اچ ترکی دی آئینی عدالت دے صدر دی قیادت اچ ہک وفد دے پاکستان دے دورے ایں شراکت داری کوں ٻیا تکڑا کیتے ۔ وقت دے نال اے تعلق صرف ڳالھ مہاڑ توں اڳوں ودھ تے عملی تعاون اچ تبدیل تھی چکئے جیند اچ تکنیکی تبادلے، تربیتی پروگرامز تے مطالعاتی دورے شامل ہن۔ ایں شراکت داری دی ہک خاص خصوصیت ٹیکنالوجی تے ادارہ جاتی مضبوطی تے ہکوجیھی توجہ اے جیند اچ عدالتی افسراں دے نال نال تکنیکی ماہرین دی شمولیت وی یقینی بݨائی ڳئی اے۔ خاص طور تے ضلعی عدلیہ دے نمایاں کارکردگی ݙکھاوݨ آلے ججاں کوں شامل کرݨ ایں منصوبے دا اہم حصہ اے خاص طور تے او جج جیڑھے پرے تے گھٹ سہولتاں آلے علاقیں اچ خدمات انجام ݙیندے پئن۔ ایندے نال اے یقینی بݨایا ویندا پئے جو عالمی تجربہ تلویں سطح تے عدالتی نظام کوں تکڑا بݨاوݨ اچ براہِ راست مدد ݙیندے۔ ایں تعاون کوں ٻئی تقویت ایں ویلھے ملی جݙاں مئی 2025 اچ پاکستان دے عدالتی نظام اچ مصنوعی ذہانت دے استعمال تے ہک سیمینار اچ ترکی دے ماہرین شرکت کیتی ہئی جیڑھا جو ٹیکنالوجی تے مبنی عدالتی اصلاحات دی طرف ہک اہم قدم ہئی۔بعد اچ، ترکیہ دے مطالعاتی دوریں دے ذریعے پاکستانی وفد کوں جدید عدالتی نظام، ڈیجیٹل انضمام تے انتظامی بہترین طریقیں توں آگاہی حاصل تھئی اے۔ جولائی 2025 اچ ہک پالیسی سطح دے وفد، جیند اچ فیڈرل جوڈیشل اکیڈمی، لاء اینڈ جسٹس کمیشن آف پاکستان تے سپریم کورٹ دے افسر شامل ہن، ترکیہ دا دورہ کیتا تاں جو عدالتی تعلیم تے ٹیکنالوجی دے انضمام دے نظام کوں نیڑے توں سمجھ سڳن ۔ اکتوبر 2025 اچ 13 ویں سمر اسکول پروگرام اچ احمد پور شرقیہ تے فورٹ عباس نال تعلق رکھݨ آلے سول ججاں دی شرکت ہک اہم پیش رفت ہئی جیڑھی جو ضلعی سطح دے ججاں دی شمولیت کوں تسلیم کرݨ دی علامت اے۔ ایں تسلسل کوں اڳوں ودھیندے آوݨ آلے مرحلے اچ پاکستان توں اٹھ نمایاں ضلعی ججاں تے مشتمل وفد ترکیہ دا دورہ کریسی جنھاں کوں ہر صوبائی ہائی کورٹ دی طرفوں نامزد کیتا ویسے تاں جو میرٹ دی بنیاد تے شمولیت تے تلویں سطح تے عدالتی صلاحیت اچ مزید ودھارا کیتا ونڄ سڳے ۔ اے ساری پیش رفت ایں ڳالھ دا ثبوت اے جو اے مفاہمتی یادداشت محض ہک رسمی معاہدہ کائنی بلکہ ہک فعال تے ارتقاء پذیر تعاون دا فریم ورک اے۔ سپریم کورٹ آف پاکستان ایں شراکت داری کوں ٻیا اڳوں ودھاوݨ کیتے پرعزم اے۔