پہلگام واقعے تے وزیراعظم شہباز شریف بھارت کوں عالمی سطح تے بے نقاب کیتے، پاکستان بھارتی بلیم گیم دا بھرپور تے موثر جواب ݙتا، عطا اللہ تارڑ

اسلام آباد۔ 26 اپریل (اے پی پی) وفاقی وزیر اطلاعات و نشریات عطا اللہ تارڑ آکھیے جو پہلگام واقعے تے وزیراعظم محمد شہباز شریف بھارت کوں عالمی سطح تے بے نقاب کیتے، پاکستان بھارتی بلیم گیم دا بھرپور تے موثر جواب ݙتے، وزیراعظم دا پی ایم اے کاکول اچ تاریخی خطاب ایں سلسلے اچ ہک اہم سنگِ میل ثابت تھئے۔ عالمی سطح تے پاکستان دے موقف کوں بھرپور پذیرائی ملی اے تے بھارت کوں سفارتی، عسکری تے بیانیہ محاذ تے ناکامی دا سامݨا کرݨاں پئے، واضح کر ݙتا ڳئے جو قومی خودمختاری تے پاݨی تے کوئی سمجھوتہ کائناں تھیسی، فیلڈ مارشل سید عاصم منیر دی قیادت اچ افواجِ پاکستان ہر جارحیت دا موثر جواب ݙیوݨ دی مکمل صلاحیت رکھیندی اے۔ میڈیا نال ڳالھ کریندے وفاقی وزیر اطلاعات آکھیے جو ہک سال پہلے وزیراعظم محمد شہباز شریف پاکستان ملٹری اکیڈمی کاکول اچ کیڈٹس نال خطاب دے دوران پہلگام واقعے دے حوالے نال پاکستان دے موقف کوں واضح انداز اچ پیش کیتا ہئی ۔ انھاں آکھیے جو 24 اپریل 2025 کوں نیشنل سیکیورٹی کمیٹی دے اجلاس اچ پاکستان بھارت دے الزاماں دا بھرپور جواب ݙتا جیندے بعد 26 اپریل 2025 کوں وزیراعظم پی ایم اے کاکول اچ اپݨے خطاب دے دوران ایں ڳالھ تے زور ݙتا جو پہلگام جیہے واقع دی آڑ اچ پاکستان تے بے بنیاد الزاماں دا سلسلہ بند ہووݨاں چاہیدے ۔ وزیراعظم ایں واقعے کوں ہک ٹریجڈی (سانحہ) قرار ݙتا۔وفاقی وزیر آکھیے جو پاکستان پہلگام واقعے دے متاثرین دے نال ہمدردی دا اظہار کیتے تے عالمی سطح تے افسوس وی ظاہر کیتے جݙاں جو ایندے برعکس بھارت دی طرفوں دہشت گردی دے واقع تے نہ مذمت کیتی ویندی اے تے نہ ہی افسوس ظاہر کیتا ویندے ۔اے ہک واضح فرق اے جو پاکستان دہشت گردی دا مقابلہ کریندا پئے جݙاں جو بھارت دہشت گردی کوں ودھارا ݙیندا پئے ۔ وفاقی وزیر آکھیے جو پاکستان دہشت گردی دے خلاف جنگ اچ بے پناہ قربانیاں ݙتن، ݙوجھی طرف بھارت دہشت گردی دی پشت پناہی کریندا پئے ۔ فتنہ الہندوستان بی ایل اے تے فتنہ الخوارج ٹی ٹی پی جیہے عناصر دے تانے بانے بھارت نال ملدن۔ انھاں آکھیے جو معیشت کوں تقریباً 600 ارب ڈالر دا نقصان برداشت کرݨاں پئے، ایں جنگ اچ 90 ہزار توں ودھ لوکاں جاناں دا نذرانہ پیش کیتے۔عطا اللہ تارڑ آکھیے جو جݙاں پہلگام واقعے اچ پاکستان دے خلاف بے بنیاد الزام لاتے ڳئے تاں وزیراعظم شہباز شریف فیلڈ مارشل سید عاصم منیر دے رلے ہک سال پہلے اڄ دے ہی ݙینھ کاکول ڳئے تے بھارت دے انھاں الزاماں دا جواب ݙیندے پہلگام واقعے کوں ہک ٹریجڈی قرار ݙتا ۔ وزیراعظم پہلگام واقعے دی شفاف تے غیر جانبدار تحقیقات دی پیشکش کیتی جیندی وجہ توں بھارت بیک فٹ تے چلا ڳیا ۔ وفاقی وزیر آکھیے جو جݙاں غیر جانبدار تحقیقات دی پیشکش کیتی ڳئی تاں ایندے پچھوں مکمل اعتماد موجود ہئی۔ بھارت ایں پیشکش دا کوئی جواب کائنی ݙتا کیونکہ بھارت دہشت گردی کوں پروموٹ کریندے اتے انھاں دے اپݨے ہتھ پہلگام واقعے دا نشانہ بݨݨ آلیں دے خون اچ رنگیے ہوئن۔انھاں آکھیے جو بھارت دی سول سوسائٹی، میڈیا تے سیاستداناں بھارتی سرکار کوں پہلگام فالس فلیگ آپریشن دا ذمہ دار ٹھہرائے ۔ انھاں آکھیے جو وزیراعظم شہباز شریف دے کاکول اچ تاریخی خطاب دے بعد پوری دنیا پاکستان دے موقف کوں نہ صرف منیا بلکہ اوندی تعریف کیتی ۔ وفاقی وزیر اطلاعات آکھیے جو بھارت ہمیشہ دہشت گردی دا سہارا ڳھدے، بھارت پاݨی دے معاملے کوں وی ہتھیار دے طور تے استعمال کیتے ۔ ایں ایشو تے وزیراعظم واضح کیتے جو پاݨی اساݙی ریڈ لائن اے۔ وزیراعظم واضح موقف اختیار کیتے جے پاکستان دے حصے دا پاݨی روکیا ڳیا تاں پاکستان ایندا بھرپور تے فیصلہ کن جواب ݙیسی۔وفاقی وزیر آکھیے جو پی ایم اے کاکول دا تاریخی خطاب قومی تاریخ اچ ہک اہم سنگِ میل دی حیثیت رکھیندے جیندی اڄ پہلی سالڳنڈھ اے۔ انھاں آکھیے جو ایں دوران اللہ دے فضل نال پاکستان کیتے نویں رستے کھلئن۔ وزیراعظم ایں اعتماد دے نال آکھیا ہئی جو مسلح افواج وطن دے دفاع کیتے ہر ویلھے تیار اے تے فیلڈ مارشل سید عاصم منیر دی دلیرانہ قیادت اچ افواجِ پاکستان کہیں وی جارحیت دا موثر جواب ݙیوݨ دی بھرپور صلاحیت رکھیندی اے ۔ انھاں آکھیے جو معرکہٴ حق دے دوران پاکستان منظم انداز اچ جواب ݙتا تے دشمن دی ملٹری تنصیبات کوں نشانہ بݨایا جیندے بعد پوری دنیا ݙٹھا جو بھارت کیڑھے طریقے نال گھٹنے ٹیکݨ تے مجبور تھیا۔ تساں ݙیکھو جو معرکہٴ حق تے آپریشن بنیان مرصوص اچ ملک اپݨے دفاع کوں ثابت کیتے۔وفاقی وزیر اطلاعات عطا اللہ تارڑ آکھیے جو وزیراعظم کاکول اچ خطاب دے دوران ایں عزم دا اعادہ کیتا ہئی اے جو افواجِ پاکستان تے 24 کروڑ عوام ڈٹ تے کھڑن۔ انھاں آکھیے جو ہک پاسے بھارت دی بلیم گیم ہئی جݙاں جو ݙوجھے پاسے پاکستان دا سچ ہئی ۔ وزیراعظم اپݨے خطاب اچ اے وی آکھیا ہئی جو بھارت ݙے کوڑے الزاماں دے سوا کجھ کائنی، تاں پوری دنیا دے سامݨے پاکستان دا سچ ہک چمکدار سجھ وانڳوں ابھریا ۔ سفارتی میدان، بیانیے دی جنگ، تے آپریشن بنیان مرصوص سودھے سارے محاذاں تے بھارت کوں شکستِ فاش تھئی اے۔ وفاقی وزیر آکھیے جو وزیراعظم دے خطاب پہلگام واقعے دے بعد جیڑھی پالیسی سمت متعین کیتی ہئی ، ایندے مثبت اثرات سامݨے آئن۔ فیلڈ مارشل سید عاصم منیر دی قیادت اچ افواجِ پاکستان ملک دے دفاع کوں موثر انداز اچ یقینی بݨائے۔